Бүгін Атырауда облыстық білім беру басқармасының «Таланттарды анықтау және қолдау орталығының» ұйымдастыруымен «Qabilet» қызметін насихаттауға яғни, мектеп жасындағы балалардың «4К» саласындағы сыни ойлау, креативтілік, коммуникация және ынтымақтастық қабілеттерін анықтап, дамытуға бағытталған екі күндік семинар-тренинг өтті. Іс-шараға облыстың жүзге жуық педагог-психолог маман қатысты.
«Qabilet» қызметінің негізгі міндеті – барлық оқушылардың қабілеттері мен кәсіби бағдарын диагностикалауға тең қол жеткізу жүйесін құру, оның ішінде дарынды балалардың қабілеттерін дамытуға жәрдемдесу, олардың зияткерлік және жеке әлеуетін іске асыру үшін жағдай жасау. Сонымен қатар, үздіктерді одан әрі оқыту және дамыту үшін ең қабілетті оқушыларды іріктеу, яғни жүзден жүйрік өрендерге бағыт-бағар беріп, жөн сілтеу, қолдау көрсету болып табылады. Ал, бұл ретте педагог мамандардың біліктілігін арттырудың маңызы зор.
Айта кетейік, «Qabilet» қызметін «Еl umiti» қоры «Дарын» орталықтарымен бірлесіп жүзеге асырады. Жалпы, Qabilet онлайн платформасы кез-келген оқушы үшін қолжетімді әрі тегін және платформада ата-аналарға арналған жеке кабинет те бар, онда баланың қандай сынақтардан өткенін, оның қандай қабілеттері дамығанын немесе қай бағытта дамыту керектігін көруге болады.
Мәлике ҚУАНЫШЕВА
