Қызылқоғада шегірткеге қарсы күрес күшейтілді
Қызылқоға ауданында көктем шығысымен шегірткеге қарсы күрес жұмыстары қарқын алды. Биыл ауданда 21 мың гектар жер итальяндық прус шегірткесіне қарсы химиялық өңдеуден өтеді. Алғашқы ошақтар Ойыл ауылдық округінен анықталып, жедел түрде улау шаралары басталды.
Қызылқоға аудандық әкімдігінің баспасөз хатшысы Жанас Қожырбаевтың хабарлауынша, зиянкестерге қарсы өңдеу жұмыстарында заманауи әдістер кеңінен қолданылып жатыр. Атап айтқанда, улы препараттар дрондар арқылы шабындық алқаптарға себіліп, шегірткелерге қарсы тиімді әрекет жасалуда.
Қызылқоға аудандық аумақтық инспекциясының басшысы Руслан Шұғайыповтың айтуынша, 6 мамырдан бастап шегіртке дернәсілдері жер бетіне шыға бастаған, содан бері барлау және улау шаралары жүйелі түрде жүргізілуде.
«Қолданылып жатқан ‘Койра Инсектицид’ препараты 2 аптадан 4 аптаға дейін тиімділігін сақтайды. Уланған аумаққа шегірткелер қайта келіп, уланған шөпті жесе де қырылады. Қазір Ойыл округінде жұмыс жүргізудеміз, алда – Көздіғара, Миялы, Тайсойған ауылдық округтері тұр», – деді инспекция басшысы.
Улау жұмыстарын жеделдету үшін көршілес облыстардан екі газ генераторы бар арнайы автокөлік жеткізілді.
Шаралардың орындалу барысымен танысу үшін Атырау облыстық мәслихатының депутаты Айбар Ерекешов арнайы келіп, жүргізіліп жатқан процесті бақылап шықты.
«12 жылда бір рет қайталанатын бұл шегіртке түрі өте қауіпті. Қызылқоға ауданы — ірі шабындық аймақ. Бұл өңір тек өзін ғана емес, Жылыой, Махамбет, Исатай аудандарын және Маңғыстау облысының біраз бөлігін шөппен қамтамасыз етеді. Сондықтан бұл аумақты аман сақтау – стратегиялық маңызға ие», – деді депутат.
Қауіпсіздік мақсатында уланған аумақтар белгіленіп, тұрғындарға мал жаюға тыйым салынатыны туралы ескерту жасалды. Жақын күндері күрес шаралары Тайсойған округінің Ойтаң аумағында жалғасады.
Аудан әкімдігі шегірткемен күресті тек улау емес, ауыл шаруашылығын, мал азығын және өңірдің азық-түлік қауіпсіздігін қорғау жолындағы маңызды іс деп бағалап отыр.
Алтыншаш ҚҰРМАШЕВА
