Егін шаруашылығы: Биылғы жоспар қандай?
Егін шаруашылығы – агроөнеркәсіп кешеніндегі маңызды да жетекші салалардың бірі. Биыл Атырау облысында егін өсірумен шұғылданатын 240 шаруашылық құрылымы мен жеке сектор бойынша жалпы ауданы 9 654 гектар жерге егін салу жоспарланған. Оның 638,7 гектарын – картоп, 3 070 гектарын – көкөніс, 1 415 гектарын – бақша және 4 530 гектарын мал азықтық дақылдар егістігі қамтиды. Былтыр егістік алқабын тасқын судың басуы себепті оның аумағы екі есеге дейін азайғаны мәлім. Сөйтіп, нақтысында егін салынатын жердің көлемі 5 260,7 гектарды құрады. Ал биылғы межеленген жоспар қандай? Бұл бағытта қандай жұмыстар атқарылып жатыр? Біз осы сауалдарға жауап іздедік.
Қамданыс қарекеттен басталады
Облыстық ауыл шаруашылығы басқармасының бөлім басшысы Азат Қапановтың айтуынша, аймақта ертеңгі күннің береке негізін қалайтын жауапты да маңызды науқан – көктемгі дала жұмыстарына дайындық шаралары белгіленген кестеге сай жүргізілуде. Бүгінгі күнге жоспарланған егістік жердің басым бөлігі (96%-ы) жыртылған. Облыс бойынша көктемгі дала жұмыстарына барлығы 780 ауыл шаруашылығы техникасы (оның ішінде: 450 трактор, 330 ауыл шаруашылығы машинасы) және су айдау насостары жұмылдырылады. Шаруашылық субъектілерін қажетті жұмыс күшімен қамтамасыз ету мақсатында биыл облыс бойынша 680 квота бөлінсе, наурыз айында жұмысқа тартылатын шетелдік азаматтардың үштен біріне рұқсат берілген.
Отын, тұқым, тыңайтқыштан тапшылық болмайды
Шаруашылық субъектілерінен келіп түскен өтінімдердің негізінде көктемгі дала жұмыстарына 24 шаруа қожалығын 148 тонна жеңілдетілген дизель отынымен қамтамасыз ету көзделген. Әлеуетті жабдықтаушыны анықтау мақсатында өткізілген ашық конкурстың қорытындысында жергілікті «Таңжаров М.И.» жеке кәсіпкерлігі жеткізуші оператор болып тағайындалды. Кәсіпкер дизель отынының бір литрін 255 теңгеден жеткізуге келісімшартқа отырды.
Тұқыммен жабдықтау жайына келсек, қажеттілік: картоптан – 1 916,1 тонна, көкөністен – 3,68 тонна, бақшадан – 2,83 тонна, мал азықтық дақылдардан – 72,48 тоннаны құрап отыр. Керекті тұқым Атырау қаласындағы әлемдік тұқым өндіруші компаниялардың ресми дистрибьюторы болып табылатын «Галион Агро» ЖШС-нен сатып алынуда. Сонымен қатар картоп тұқымы республиканың басқа аймақтарынан, сондай-ақ Ресей Федерациясының Астрахан, Волгоград қалаларынан және өзге де өңірлерден жеткізілуде.
–Биыл егістік науқанына 56 шаруа қожалығы 918 тонна тыңайтқыш сатып алуды жоспарлаған. Оның 869,5 тоннасы – аммиак селитрасы, 48,5 тоннасы – аммофос. Өткен жылы бұл көрсеткіш 674,9 тоннаға тұрақтаған. Межеленген егіндіктің тең жартысынан астамын немесе 5 100 гектарын тамшылатып, қалған 4 500 гектарын жаңбырлатып суару тәсілімен баптап-күту жоспарланып отыр, – дейді салалық басқарманың өкілі А.Қапанов.
Айта кету керек, аудандар бойынша зерделегенде, Махамбет – облыстағы ең егіні көп өңір ретінде ерекшеленсе, одан кейінгі орындар Атырау қаласы, Индер мен Құрманғазының еншісінде екен.
Дәулетқали АРУЕВ
