Атырауда қала әкімінің шыршасы өтті

     Бүгін Абай атындағы оқушылар орталығында қала әкімінің жаңа жылдық шыршасы өтті.
Мерекелік іс-шараға ата-анасының қамқорлығынсыз қалған, әлеуметтік аз қамтылған, көп балалы отбасылардың балалары мен мүгедектігі бар 600 бала қатысты.

    Іс-шара барысында Атырау қаласының әкімі Шәкір Кейкін балаларды мерекемен құттықтап, жылы лебізін білдірді. 

  – Бүгін сіздер үшін ұйымдастырылып жатқан жаңа жылдық мерекені қала әкімдігінің атынан және өз атымнан шын жүректен құттықтаймын! Жаңа жыл бұл – жаңа үміттер, жаңа армандар мен жақсылықтардың бастауы. Жаңа жылда барлық арман – мақсаттарыңыз орындалып, өмірлеріңіз тек қуанышқа толы болсын! Әрқашан білімде, спортта, өнерде үздік болуға талпынып, алға ұмтылыңыздар, — деді шаһар басшысы. 

   Мерекелік кеш барысында жаңа жылдың басты кейіпкерлері – Аяз ата мен Ақшақар ортаға шығып, мерекеге сай әдемі безендірілген шыршаның шырағын жаққызды. Думанды кешке қатысқан балалар ертегі кейіпкерлерімен бірге би билеп, түрлі сыйлықтар алып, қызықты ойындар ойнады.

Тоғжан ЕРМЕК,

Суреттерді түсірген Әнуар ӘБІЛҒАЗИЕВ