Атырауда жаңа заманауи оңалту орталығы ашылады
Атырауда ерекше қажеттіліктері бар жандарға арналған 150 орындық жаңа реабилитациялық орталықтың құрылысы аяқталуға жақын. Қазір нысанда ішкі әрлеу және абаттандыру жұмыстары жүргізілуде. Бұл туралы облыстық құрылыс, сәулет және қала құрылысы басқармасының басшысы Нұрберген Құсайынов мәлімдеді, – деп хабарлайды Өңірлік коммуникациялар қызметі.
2023 жылдың шілде айында басталған құрылыс-монтаж жұмыстарын “БатысАльянсСтрой” компаниясы жүргізуде.
— Бүгінде нысанның құрылысы толық аяқталып, ішкі әрлеу және абаттандыру жұмыстары жүргізілуде. Орталық жылына мүгедектігі бар мыңдаған ересек адам мен баланың әлеуметтік көмек алуына мүмкіндік береді. 150 орындық заманауи ғимараттағы 83 кабинет қажетті құрылғылармен жабдықталады, — деді Н.Құсайынов.
Облыстық жұмыспен қамтуды үйлестіру және әлеуметтік бағдарламалар басқармасының басшысы Полымбет Хасановтың айтуынша, жаңа орталық мүгедектігі бар жандардың әлеуметтік өмірге бейімделуіне, психологиялық қолдау алуына және денсаулықтарын жақсартуға мүмкіндік береді.
Атырау облысы бойынша бүгінде 26 мыңнан астам мүгедектігі бар адам тіркелген, ішіндегі 4500-ден астамы — балалар.
Ал заманауи құрылғылармен жабдықталатын жаңа орталықта шамамен 100-ден астам маман қызмет көрсетеді. Олар жыл сайын мүмкіндігі шектеулі мың шақты бала мен ересек азаматтарға арнаулы әлеуметтік және медициналық көмек көрсетуді жоспарлап отыр.
