Студенттер ақын-жазушылармен жүздесті

Әдебиет – ел руханиятының өзегі, ұлттың жүрегі. Жастардың көркемсөзге қызығушылығын оятып, қаламгерлермен тікелей жүздестіру – бүгінгі білім ордаларының басты бағыттарының бірі. Осындай мақсатта Халел Досмұхамедов атындағы Атырау университетінде Қазақстан Жазушылар одағының мүшелері, белгілі ақын-жазушылар мен әдебиет сыншыларымен рухани кездесу өтті.

Басқосуды университет ректоры Саламат Идрисов ашып, әдебиет майталмандарымен жүздесудің жастар үшін маңызы зор екенін атап өтті.
Кеш қонақтарының бірі – филология ғылымдарының докторы, профессор Қансейіт Әбдезұлы оқу орнының тарихына тоқталып, университет кітапханасына жазушы Әбдіжамал Нұрпейісовке арналған «Әбенің әлемі» жинағы мен өзінің ғылыми еңбектерін сыйға тартты.

Ал Мемлекеттік сыйлықтың лауреаты, «Парасат» орденінің иегері, ақын Иранбек Оразбаев Абайдың мұрасын қадірлеу керектігін айтып, «Абайды оқы» атты өлеңін тебіреніспен оқып берді.

Кеш барысында өзге де қаламгерлер көркем сөзбен сусындатып, күй мен ән әуелеген тағылымды басқосу жас ұрпақтың рухани әлеміне тың серпін берді.

Еркеназ ҚАЛИЖАН
Суреттерді түсірген Ерлан АЛТЫБАЕВ