Атырауда ерекше поэзия фестивалі өтті
Атырауда «Атадан туған аруақты ер» поэтикалық жобасы аясында поэзия фестивалі өтті. Атырау облысы Мәдениет және тілдерді дамыту басқармасы мен Азаматтық бастамаларды қолдау орталығының қолдауымен ұйымдастырылған іс-шараның мақсаты да ауқымды.
“Жастар рухы” ЖҚ Атырау облыстық филиалының төрағасы Абылай Құрметұлының айтуынша, жоба Атырау өңірінің жазба поэзиясын дамыту, жастардың поэзияға деген қызығушылығын арттыру мақсатын көздейді.
Жыр кешіне жастар, жас ақындар, жазушылар, ақындар қатысты. Жырсүйер жастар Махамбет Өтемісұлының жырлары және қазақ әдебиетіндегі ұлы тұлғалардың, жазушылардың шығармаларын оқыды.
Әдеби-рухани шарада жыл бойына ұйымдастырылған іс-шараларға белсене қатысып, мәдениетке қосқан үлестері үшін бірнеше жас алғыс хаттармен марапатталады. Оны “AMANAT” партиясы Атырау облыстық филиалының төрағасы Абдолла Идресов тапсырды.
Айта кетелік, қазан-қараша айларында «Атадан туған аруақты ер» жобасы аясында поэзия кештері, жас ақындарға арналған мастер класстар ұйымдастырылып және қазақ поэзиясы мен әдебиетінің өткені мен бүгіні туралы подкаст түсірілген болатын.
Рита ЖАЙҒАЛИҚЫЗЫ
Суреттерді түсірген Ерлан АЛТЫБАЕВ
