Рубрика: 2015 – Ассамблея жылы

Елбасы ұсынған 100 нақты қадамнан тұратын Ұлт жоспары – ұлтымызды баянды болашаққа жетелейтін даңғыл жол. Бұл, ең алдымен, халқымызды ауызбіршілік пен ынтымақтың арқасында Мәңгілік Ел болуға бастайтын бірегей реформа деп білемін.

Туған еліміздің мемлекеттігін одан әрі нығайтуға, әлеуметтік-экономикалық әлеуетін арттыруға және халқымыздың әл-ауқатын жақсартуға бастайтын Елбасы жариялаған бес халықтық реформаның төртінші бағыты «Біртектілік пен бірлік» деп аталады.

Сан түрлі ұлттың бір мүдде, бір мақсатта тіл табысуына, еліміздегі ұлт саясатын жүзеге асырып, ұлтаралық татулықтың қазақстандық үлгісін дамытуға атсалысып отырған Атырау облысы Қазақстан халқы Ассамблеясының ғылыми-сараптамалық тобы аймағымыздағы оқу орындарымен тығыз байланыс орнатқан.

Шетелдiк сарапшы топтар, әртүрлі елдердің ғалымдары мен дипломаттары соңғы үш жыл ішінде этносаралық келiсiмдi қалыптастырудағы Ұлы Дала елінің тәжiрибесiн үйрену үшiн Қазақстан халқы Ассамблеясы хатшылығына 60-тан аса өтiнiш жiберген.

Биылғы жылдың ерекшелігі сол, бұл – мерейлі белестер жылы. Қазақ хандығының 550 жылдығы, Ұлы Жеңістің 70 жылдығы, Қазақстан халқы Ассамблеясының, Конституцияның 20 жылдығы сынды атаулы даталар дәстүр мен мәдениетке бай қазақ халқының сындарлы кезеңнен тұратын тарихи ғасырларды бастан өткергенін көрсетеді. Сындарлы кезең дегеннен шығады, бір кездері «ұлттар достығының лабораториясы» атанған қазақ жері әу бастан түрлі этностарды біріктірген киелі мекен бола білді.