Жас дарындар Республика күніне тарту жасады

«Атырау» сауда-ойын сауық орталығында Республика күніне арналған мерекелік концерт өтті. Мерекелік шараны «Sattilik» және «Stylemix» өнер мектептері бірлесіп ұйымдастырды.

Концерт барысында жас өнерпаздар ел мерейін асыратын әсем әндер мен би нөмірлерін орындап, көрерменге көтеріңкі көңіл-күй сыйлады. Әсіресе, «Sattilik» өнер мектебінің би ұжымы ұсынған заманауи және ұлттық нақыштағы билер көрермендердің ыстық ықыласына бөленді.

– Республика күні – елдің ең қастерлі мерекелерінің бірі. Біз бұл күнді ерекше шабытпен қарсы алдық. Мақсат – балалардың шығармашылық қабілетін танытып қана қоймай, өнер арқылы елге деген сүйіспеншілікті жеткізу, – дейді «Sattilik» өнер мектебінің хореографы Серік Елеубай.

Мерекелік іс-шара Атырау жұртшылығына көтеріңкі көңіл күй сыйлап, жас өнерпаздардың талантын паш еткен ерекше өнер думанына айналды.

-Мұндай мерекелік концерттер балалар үшін аса қажет. Бір жағынан олар ең басты мерекемізді сезініп өссе, екінші жағынан өздерінің барып жүрген орталықтарымен бірге есеп береді, — дейді қала тұрғыны Венера Мұстафина.

Айбөпе САБЫРОВА