– Атырау облысы еліміздің мұнайлы астанасы саналады. Мұнда елуден астам елдің компаниялары жұмыс жасауда. Ал, Жапониямен қарым-қатынасқа келер болсақ, соңғы жылдары тауар айналымы көлемі едәуір артты. Мен Жапонияда қызмет бабымен бірнеше рет болып, әсіресе, жапондықтардың қаптама құбыр жасаудағы тәжірибесіне тәнті болдым. Атырауда жапондық компанияның араласуымен төрт мекеме жұмыс жасайды. Сіздің өлкемізге сапарыңыз біздің екі жақты қарым-қатынасты одан әрі бекіте түсеріне сеніміміз мол, – деді облыс басшысы Бақтықожа Салахатдинұлы.
Елші өз сөзінде жыл санап Жапонияның Қазақстанмен іскерлік байланыс орнатуға ынта-құлшынысы артып келе жатқанын мәлімдеп, екі ел арасында тікелей әуе рейстерін ашу жөнінде ұсыныс жасады. Бұл орайда облыс әкімі Атырау – Токио бағытында тіке рейс ашу тиімді екенін атап айтты.
Айгүл ЕРТІЛЕУ.
Суретті түсірген Әнуар ӘБІЛҒАЗИЕВ.
