ЖАҢА БАС ИМАМ – БАТЫРЖАН МАНСҰРОВ

Қасиетті жұма күні Атырауда облыстың бас имамы ауысты. Бас мүфти Ержан Маямеровтің бұйрығына сәйкес, Қазақстан мұсылмандары діни басқармасының Атырау облысындағы өкіл имамы, «Иманғали» мешітінің бас имамы болып Мансұров Батыржан Берденұлы тағайындалды.
Атырау облысының бұған дейін бас имамы міндетін атқарып келген Амантай Садиев өз өтініші бойынша орнын босатты.

Облыстың жаңадан тағайындалған бас имамы Батыржан Мансұров 1978 жылы дүниеге келген. Ол Халықаралық қазақ-араб университетінде бакалавриатты, Абылайхан атындағы Қазақ Халықаралық қатынастар және Әлем тілдері университетінде магистратураны тәмамдаған. Түркияның Стамбул қаласында Қ.А.Яссауи атындағы Құран курсында және Египеттің Каир қаласында мұғалімдер дайындайтын курстарда білімін шыңдаған.
Сонымен қатар, Әл-Фараби атындағы Қазақ ұлттық университеті филология факультетінің докторанты. Әр жылдары ол Халықаралық қазақ-араб университетінің қазақ тілі мен араб тілі пәндері бойынша оқытушы, «Хикмет» ЖШС баспа үйінің директоры және рухани-танымдық, діни, тарихи-мәдени «Рахмет самалы» журналының бас редакторы, ҚМДБ-ның Республикалық имамдардың білімін жетілдіру институтының ұстазы, Алматы облысы, Талғар ауданы, Белбұлақ ауылында орналасқан «Шамалған» медресесіне қарасты Мұрат Төреқұлұлы атындағы қарилар дайындайтын бөлімнің басшысы қызметтерін атқарған.
Ал, Атырау облысының бас имамы қызметінен босатылған Амантай Садиев Шымкент қаласындағы мешітте наиб-имам міндетін атқаратын болады.

Баян АТАЙМАНҚЫЗЫ.

Баға берсеңіз
Атырау газеті
Пікір қалдырыңыз