Ұлттық банк базалық мөлшерлемені 18%-ға көтерді

Қазақстан Ұлттық банкінің Ақша-кредит саясаты комитеті базалық мөлшерлемені жылдық 18%-ға дейін, ±1 пайыздық тар ауқыммен көтерді. Бұл шешім қыркүйек айында инфляцияның үдеуіне байланысты қабылданды – ол тамыздағы 12,2%-дан 12,9%-ға дейін өсіп, реттеуші органның болжамынан асып түсті.

Ұлттық банк төрағасы Тимур Сүлейменов шешім қабылдау кезінде ең басты назар халықтың әл-ауқатын арттыруға аударылатынын айтты.

– Бізден кейде базалық мөлшерлеменің өсуі несиелер мен банктерге қалай әсер етеді деп сұрайды. Онда біз үшін ең маңыздысы – халықтың әл-ауқаты мен нақты табысының өсуі екенін айтамыз. Қазақстандықтардың қолында көбірек ақша қалуы және инфляция сол ақшаны «жеп қоймауы» маңызды. Біздің негізгі құралымыз – базалық мөлшерлеме, сондықтан батыл қадамдарға барамыз, бұл бізге оңайға соқпайды. Біз макроэкономика және халықтың әл-ауқаты тұрғысынан қараймыз. Инфляция – халық табысының жауы, және оны жеңуіміз керек, – деді ол.

Бұл шешім қазақстандықтарға қалай әсер етеді?

1. Депозит иелері үшін:

Енді теңгеде жинақтау тиімді бола түседі. Банктер депозит мөлшерлемесін арттырады, яғни біздің жинағымыз құнын жоғалтпай, баға өсімінен де жылдамырақ көбейеді.

2. Теңге бағамы үшін:

Бұл теңгені нығайтады. Мөлшерлеме жоғары болған сайын ұлттық валюта тартымдырақ болады, ал бағам тұрақтанады. Доллармен жұмыс істейтіндер үшін бұл — жақсы жаңалық.

3. Баға өсіміне қарсы:

Негізгі мақсат — баға өсімін тежеу. Иә, несиелер қымбаттайды, бірақ бұл адамдарды ақшаны аз жұмсауға итермелейді. Сәйкесінше, дүкендердегі бағалар да баяу өсетін болады.

4. Несиелер туралы:

Енді банктер несиені кез келген адамға бере бермейді. Қарызды қайтара алатын клиенттер мұқият таңдалады. Бұл қаржы жүйесіндегі тәуекелдерді азайтады.

5. Бизнес үшін:

Кәсіпкерлер үшін ең маңыздысы – теңге бағамының тұрақтылығы. Иә, несиелер қымбаттайды, бірақ есесіне импорт пен баға саясатын тұрақты жоспарлауға мүмкіндік туады.

6. Тұрғын үй нарығы:

Бұл шешім баспана нарығын «суытуы» мүмкін. Себебі ипотека қымбаттайды, сұраныс азаяды, нәтижесінде пәтер бағасының өсуі тоқтауы ықтимал.

7. Болашаққа көзқарас:

Бұл – алдын ала жасалған қадам. Қазір қатаң шаралар қабылдап, инфляцияны төмендету – болашақта экономиканың бұзылуына жол бермеудің ең дұрыс жолы.

8. Жинақ пен шығын туралы:

Бұл жаңа экономикалық кезеңнің белгісі. Енді ақшаны тез жұмсағаннан гөрі депозитте сақтау тиімді. Өйткені жинақтау арқылы табыс табу мүмкіндігі артты.

Сурет: Gov.kz