«Сармат» мектебінде «Жас шекарашы» клубы ашылды
«Сармат» мамандандырылған мектеп-лицей-интернатының саптық алаңында “Жас шекарашы” балалар әскери-патриоттық клубының салтанатты ашылу рәсімі өтті. Шара аясында оқушылар «Жас шекарашылар» қатарына қабылданып, арнайы куәліктерін алды.
Салтанатты жиын мемлекеттік Әнұранмен басталып, «Жас сарбаз» балалар-жасөспірімдер әскери-патриоттық қозғалысының туы енгізілді. Әскери дәстүрге сай сәлемдесу рәсімі орындалып, қонақтар мен қатысушыларға патриоттық рухтағы өлең жолдары оқылды.
Іс-шараға ҚР ҰҚК Шекара қызметінің Атырау облысы бойынша департаменті басшылығы, застава өкілдері, әскери бөлім командирлері және қонақтар қатысты. Жиын барысында ҚР Ұлттық қауіпсіздік комитеті Шекара Атырау облысы бойынша департамент бастығының орынбасары, полковник Орал Батырғалиев «Сармат» мамандандырылған мектеп-лицей-интернатының директоры Нұрлан Елеуовке ту табыстады.
«Жас шекарашылар» тобының саптық алаңға шығуы ерекше патриоттық рух сыйлады. Қатарға 11-сынып оқушылары Мақсат Ұзаққайыр, Амандық Қуандық, сондай-ақ 7 «Г» сынып оқушылары қабылданды. Салтанатты рәсімде жас шекарашылар Отанға адал қызмет етуге, білімге ұмтылуға, тәртіп пен қырағылықты сақтауға ант берді.
Ант қабылдаған соң оқушыларға куәліктер табысталды. Бұл рәсім олардың еліміздің шекарасын қорғауға дайын, батыл әрі отансүйгіш азамат болып қалыптасуына бағытталған маңызды қадам болды.
Жас өрендерді құттықтау сөздері айтылып, қонақтар жас шекарашылардың болашағына сәттілік тіледі. Саптық алаңнан шерулете шыққан оқушылар мерекелік шараға ерекше сән берді.
Еркеназ ҚАЛИЖАН
