«Нұрсая» мөлтекауданында орналасқан «Сарайшық» коммуналды базарының ғимаратынан өрт шықты. Бұл туралы Атырау облыстық «Төтенше жағдайлар департаменті өрт сөндіру және құтқару жұмыстары қызметі» мемлекеттік мекемесінің баспасөз қызметі хабарлады.
«15 маусымда сағат 00:54-те 101 телефонына «Сарайшық» базары аумағында өрт шыққаны туралы хабар келіп түсті. Өрт жалпы ауданы 45 шаршы метр аумақты шарпыды. Келушілер болмағандықтан базар аумағында көшіру жұмыстары жүргізілген жоқ», – дейді аталмыш мемкеменің баспасөз қызметінің маманы Жанар Қаржаубаева. Өрт салдарынан азық-түлік бөліміндегі 13 тоңазытқыш жанып кеткен. Түн жарымында орын алған тілсіз жауды ауыздықтауға 4 бірлік техникасы мен 34 адамнан тұратын жеке құрам жұмылдырылды. Жедел іс-әрекеттің нәтижесінде жалынның базардың негізгі ғимаратына жайылуына жол берілген жоқ. Сағат 01:50-де өрт толық жойылды. Құрбан болғандар мен зардап шеккендер жоқ. Оқиғаның себебі мен келтірілген шығындар анықталуда.
Рита ӨТЕУҒАЛИ.
Сурет azh.kz сайтынан алынды.