Қазақ қонақжайлылығына берілген баға
Алматы туралы АҚШ Мемлекеттік хатшысының орынбасары Кристофер Ландаудың жылы пікірін зор қызығушылықпен оқыдым. Оның сөздерінен елімізге деген құрмет пен шынайы ықылас байқалады. Әсіресе, Алматының табиғи сұлулығын, Іле Алатауының әсем көрінісін және «Шымбұлақ» тау шаңғы курортын ерекше атап өтуі шетелдік қонақтардың Қазақстанның тартымдылығын жоғары бағалайтынын көрсетеді.
Кристофер Ландаудың «қазақ халқының ерекше қонақжайлылығын сезіндік» және «жаңа қазақ достарымның арасында өзімді үйімдегідей сезіне бастадым» деген сөздері мені ерекше әсерге бөледі. Бұл – халқымыздың бауырмал, кеңпейіл қасиетінің нақты дәлелі. Шетелдік дипломаттың осындай жылы сөздері Қазақстанның әлем алдындағы бейнесін нығайтып, елімізді бейбітшілік пен достықты дәріптейтін мемлекет ретінде танытады.
Менің ойымша, осындай сапарлар мен пікірлердің мәні өте зор. Олар мемлекеттер арасындағы ынтымақтастықты арттырып қана қоймай, жастарға да үлгі болады. Біз өз елімізді осылай танытқан адамдардың еңбегін бағалай білуіміз керек. Себебі шетелдік қонақтардың оң көзқарасы – біздің мәдениетімізге, тарихымызға, және ұлттық болмысымызға деген құрметтің белгісі.
Осындай жылы пікірлерді есту – әрбір қазақстандық үшін мақтаныш. Бұл біздің елдің қонақжай, бейбіт және ашық қоғам екенінің айғағы. Мен де болашақта елімнің халықаралық беделін арттыруға, мәдениетіміз бен дәстүрімізді әлемге танытуға өз үлесімді қосуды армандаймын.
Ердәулет СЛАНҰЛЫ,
Қ.Сәтбаев атындағы Қазақ ұлттық техникалық зерттеу университетінің “Қаржы, экономика банк және сақтандыру ісі” мамандығының III курс студенті
