Ұлы Отан соғысы жылдары неміс басқыншыларын талқандауда Қазақстан халқының майданда және тылда көрсеткен ерен ерлігі ұшан-теңіз екені сөзсіз. Сол себепті біз аталмыш қосымшада майдангерлер өмірі мен естеліктерін, сондай-ақ, адам төзгісіз жағдайда ерен еңбек еткен тыл еңбеккерлерінің ерлік істері хақында кеңінен мәлімет беруді көздеп отырмыз. «Гурьев – Астрахан» темір жол табанын салу кезіндегі қиындықтар, Атырау соғыс жағдайындағы бірден-бір облыс болып жарияланған тарихи кезеңдер өз алдына зерттеу нысаны болмақ. Бүгінде белгілі болып отырған тың деректер де қосымшада көрініс табады. Тарихшы-ғалымдардың өткен күнге жаңаша көзқарасы, пікірлері де оқырман қызығушылығын тудырады деген ойдамыз.
Біздің мақсат – елін, жерін, Отанын сүйген ардақты азаматтарымыздың өшпес ерлігі мен қайсар рухына бас иіп, құрмет көрсету, жас буынды отаншылдыққа, қазақстандық патриотизмге, ұлтжандылыққа тәрбиелеу.
Құрметті оқырман! Газет қашанда оқырманымен ғұмырлы. Ендеше, сіздерден ой-пікір, қолдау күтеміз. Аға буынның мәңгілік ерлігі, өшпес рухы жайлы жырды бірге жазалық, ағайын!
