Мақатта балалар ойын алаңдары ашылды

Республика күні қарсаңында Мақат ауданының Мақат кентінде балалар мен жасөспірімдерге арналған жаңа ойын және спорт алаңы пайдалануға берілді. Заманауи талаптарға сай жабдықталған бұл нысандар С.Мұқашев көшесіндегі 80/2 және 32/2 көпқабатты тұрғын үйлердің аумағында орналасқан.

Аудан әкімдігінің баспасөз қызметінің хабарлауынша, жаңа нысанның ашылу салтанатына өңір әкімі Азамат Мәмбетов қатысып, тұрғындарды қуанышты сәтпен құттықтады. Ол балалардың бос уақытын тиімді өткізуіне, салауатты өмір салтын ұстануына жағдай жасау – ауданның басты басымдықтарының бірі екенін атап өтті.

– Балаларға арналған алаңдардың ашылуы – олардың еркін ойнап, спортпен айналысуына мүмкіндік береді. Мұндай игі істер алдағы уақытта да жалғасын табады, – деді аудан басшысы.

Іс-шара барысында жаңа алаңның лентасы қиылып, тұрғындар ұйымдастырушыларға ризашылықтарын білдірді.

Айта кетейік, пайдалануға берілген ойын және спорттық алаңдар толықтай жарықтандырылған, қауіпсіздік талаптарына сай жабдықталып, кент балаларының демалысына қолайлы жағдай жасалған.

Алтыншаш НӘСІПҚАЛИҚЫЗЫ