Еріктілерге ерекше көңіл бөлінбек

Admin10.12.2025 23:42

226

Атырауда «Volunteer Awards – 2025» салтанатты іс-шарасы өтіп, өңірдің ең белсенді волонтерлері марапатталды. Олар облыстағы еріктілік қозғалысын дамытуға қосқан елеулі үлестері үшін құрметке ие болды.

Биыл облыста еріктілік қызметке шамамен 150-ге жуық күміс волонтер, 700-ге жуық жас волонтер, 50-ге жуық ұйым тартылған. Ең көбі Мақат, Қызылқоға аудандарында және Атырау қаласында тіркелген.

— 2021 жылдан бері өңірде «Demeý» облыстық байқауы өтуде. 2021–2025 жылдар аралығында үздік деп танылған 26 жобаға қаржылай қолдау көрсетілді. 2024–2025 жылдары «Біз таңдаған жол» жобасы аясында «Үздік күміс волонтер» байқауы ұйымдастырылып, оның қорытындысында 8 жоба жеңімпаз атанып, қаржыландырылды.
Биыл Атырау жастар ресурстық орталығы «Тәуелсіздік ұрпақтары» гранттық жобасын өткізді. Онда алғаш рет «Волонтерлік» бағыты енгізіліп, 3 жоба әрқайсысы 1 млн. теңгеден грант ұтып алды. Болашақта гранттар саны артады. 2026 жыл Халықаралық волонтерлер жылы болып жарияланды, — деді облыстық ішкі саясат басқармасының басшысы Гүлнұр Сүйеуова.

Келер жылдың Халықаралық волонтерлер жылы деп жариялануына байланысты, басқарма еріктілерді қолдайтын жобаларды көбейтуді және бұл бағытқа айрықша назар аударылатынын айтты.

— Корпоративтік волонтерлікті дамыту жобасы аясында біздің «Жүректен жүрекке» қоры Жастар үйінде шағын жылыжай салды. Атырау перинаталдық орталығында шала туған және ерекше күтімді қажет ететін балалардың аналарына арналған «Ana Space» бөлмесін аштық. Сонымен қатар облыстық балалар ауруханасында «Bala Space» коворкинг аймағын іске қостық. Біз үшін ең маңыздысы — әр жоба қоғамға нақты пайда әкеліп, өзгелерді де еріктілердіғ қатарына қосылуға шақыру, — деді «Жүректен жүрекке» қоғамдық қорының әлеуметтік жобалар координаторы Асылханым Ахмұрова.