1 мамыр – Қазақстан халықтары бірлігі күні мерекесінің аясында Атырауда мәдени-көпшілік шаралар өтті, деп хабарлайды Атырау облыстық Өңірлік коммуникациялар қызметі.
Мерекелік шаралар Сұлтан Бейбарыс алаңында бастау алды. Атыраулықтар мен қала қонақтары алдында этномәдени бірлестіктердің шығармашылық ұжымдары өнер көрсетті.
Мерекелік құттықтауда облыс әкімі Нұрлан Ноғаев Қазақстан халықтары бірлігі күнін атап өтудің маңыздылығына тоқталды.
–Қазір аймақта 17 этномәдени бірлестік бар. Әр түрлі ұлт пен дін өкілдері қоғам дамуына үлестерін қосып келеді. Ұзақ жылдар бойы бейбітшілік пен келісімде өмір сүріп келеміз, соның арқасында Қазақстан толерантты ел ретінде әлемге белгілі. Мемлекет басшысы атап көрсеткендей, Қазақстанның өркендеп, дамуы біздің бәріміздің ортақ мақсатымыз, – деді Нұрлан Ноғаев.
Одан әрі мереке Сұлтан Бейбарыс алаңында «Аида Кауменова» мен «Нұр-Шах» сән үйлері киімдерінің көрмесімен жалғасып, кешкі мерекелік концертпен аяқталды.
Хорлан Смадияр
