Атырауда көк байрақ көкке көтерілді

Admin25.10.2025 12:23

315

Ұлттың рухын көтерген ұлық мереке Атырау қаласында Қазақстан Республикасының Мемлекеттік Туын салтанатты түрде көтеру рәсімімен бастауын алды.
Іс-шараға облыс әкімі Серік Шәпкенов қатысты.

Мерекелік шараның басты мақсаты — Республика күні мен Мемлекеттік егемендік туралы декларацияның қабылданғанына 35 жыл толуын кеңінен атап өту, мемлекеттік рәміздерге деген құрметті арттыру, елдің тәуелсіздік жолындағы жетістіктерін дәріптеу және патриотизм мен бірлік құндылықтарын насихаттау.

Рәсім барысында Мемлекеттік Ту салтанатты түрде көтеріліп, Гимн орындалды. Отанға деген сүйіспеншілікті айшықтаған әсерлі сәттер жиылған жұрттың рухын көтеріп, елдік сезімді тереңнен оятты.
Шара аясында көрермендерге мерекелік концерттік бағдарлама ұсынылды. «Дархан» өнер мектебінің хоры «Көк тудың желбірегені» әнін орындап, ал белгілі әнші Р.Нұрмағамбетова «Сүйемін, Қазақстан!» әнін шырқады.

Бұл күн — 1990 жылы қабылданған Қазақстан Республикасының мемлекеттік егемендігі туралы декларацияның тарихи маңызын айшықтайтын дата. Дәл осы құжат тәуелсіз Қазақстанның саяси және құқықтық негізін қалаған еді.
Биылғы Республика күні ерекше тарихи мәнге ие, өйткені биыл Мемлекеттік егемендік туралы декларацияның қабылданғанына 35 жыл толып отыр. Осыған орай, Атырау облысында 15–27 қазан аралығында 70-ке жуық іс-шара ұйымдастырылуда.
Мерекелік бағдарлама аясында қала мен аудан көлемінде Мемлекеттік Туды көтеру рәсімдері, салтанатты жиналыстар, мерекелік концерттер, жастар мен білім саласына арналған байқаулар мен зияткерлік сайыстар, ғылыми конференциялар, спорттық жарыстар, эко және қайырымдылық акциялары өтуде.

Сонымен қатар «Republic Day» жәрмеңкелері, «Жеңілдіктер түні» акциясы және ірі сауда орындарында отандық өнімдерге арнайы жеңілдіктер ұйымдастырылуда. Мереке күні қала тұрғындары мен қонақтары үшін тегін қоғамдық көлік бағыттары іске қосылды.