Атырауда инклюзивті театрдың ерекше шығармашылық кеші өтті

Атыраудағы Сұлтан Бейбарыс алаңында «Талшын» инклюзивті театры «Махаббат әлемді құтқарады!» атты ашық аспан астындағы концертін өткізді. Шараның басты мақсаты – қоғамды төзімділікке шақыру, мүмкіндігі шектеулі жандардың шығармашылығын қолдау және тең мүмкіндіктерге жол ашу болды.

Көрермендерге махаббат, достық пен бейбітшілікті насихаттайтын қойылымдар ұсынылды. Арбадағы бишілер вальс билеп, көпшілікпен бірге флешмоб ұйымдастырды. Сондай-ақ қазақстандық эстраданың танымал әндері шырқалып, көрермендер әртістермен бірге қосыла ән айтты.

Концертте алғаш рет үлкен сахнаға шыққан Гүлзада Еділова да өнер көрсетті. Ол көп жылдан бері ауыр дертпен күресіп келеді. «Бұл мен үшін алғашқы тәжірибе, әрине қатты толқыдым. «Үмітім – гүлім» әнін орындадым. Бұл ән мен үшін ерекше мәнге ие: мүмкіндігі шектелгеннен кейін мен, басқалар сияқты, үмітімді жоғалттым. Бірақ жақсыға сенуді тоқтатпау керек екенін түсіндім. Осындай жоба бар болғанына қуаныштымын», – деді ол.
Облыстық мәдениет, тілдерді дамыту және архив ісі басқармасының басшысы Әбіл Жоламанов театрдың аймақтағы инклюзивтілікке қосқан үлесін атап өтті. Оның айтуынша, «Талшын» – тек мәдени шара емес, қоғамға мүмкіндігі шектеулі жандардың өмірін өзгеше қырынан көруге мүмкіндік беретін жоба.
Концерт «Біз де адамбыз» қоғамдық қоры «Теңізшевройл» компаниясының қолдауымен жүзеге асып жатқан «Шексіз шығармашылық» жобасы аясында өтті. ТШО өкілі Хэймиш Полстың сөзінше, мұндай шаралар қоғамдағы сыйластық пен қолдаудың маңызын айқындап, инклюзивті орта қалыптастыруға ықпал етеді.

Айта кетейік, жоба өткен жылы басталған. Қазір Атырауда арт-терапия, хореография, вокал және инклюзивті театр бағыттары бойынша тегін үйірмелер жұмыс істейді. Ал Құлсары қаласында қолөнер, хореография және вокал бағыттары іске қосылған. Жобаға қатысушылар саны ай сайын артып келеді.

Еркеназ ҚАЛИЖАН
Суреттерді түсірген Әнуар ӘБІЛҒАЗИЕВ