Арнайы салық режимінің қолдану тізімі жарияланды

Қазақстан Үкіметі арнайы салық режимін қолдануға болатын кәсіп түрлерінің жаңа тізімін бекітті. Құжаттың мақсаты – шағын бизнесті қолдау және салық жүйесінде әділдікті қамтамасыз ету.

Жалпы 1111 кәсіп түрінің ішінен 795-іне арнайы салық режимін қолдануға тыйым салынды. Олардың қатарында өңдеу өнеркәсібі, құрылыс, телекоммуникация, көтерме сауда, қаржы және жер қойнауын пайдалану салалары бар.

Ал 300-ге жуық қызмет түрі жеңілдетілген режимді пайдалана алады. Бұл — бөлшек сауда, қоғамдық тамақтану, тұрғын үйді жалға беру, тұрмыстық қызмет көрсету және жеке қызмет салалары.

Өзін-өзі жұмыспен қамтығандар үшін де бөлек тізім жасалды. Айына 300 АЕК-ке дейін табыс табатындар такси, жөндеу, сұлулық салондары сияқты бағыттарда АСР қолдана алады.

Жаңа Салық кодексі қабылданғаннан кейін қолданыстағы бірнеше режимнің орнына тек үш салық режимі қалады.