Atr.kz/16 шілде, 2019 жыл. Атырауда журналистер арасында «Латынға көшу – өркениетке қадам» атты байқау жарияланған болатын. Жуырда байқау жеңімпаздары белгілі болды.
Марапаттау шарасында облыстық тілдерді дамыту жөніндегі басқарманың басшысы Әсия Қыстаубаева сөз алып, байқаудың мақсаты мен маңызына тоқталды.
– Латын графикасына негізделген қазақ тілі әліпбиіне кезеңкезеңмен көшіру жөніндегі жұмыстарды бұқаралық ақпарат құралдары арқылы насихаттау – баршамыздың басты міндетіміз, – деді ол. – Мұны халық арасында кеңінен түсіндіру жұмыстарына журналистер де өз үлестерін қосуы керек.
Қазылар алқасының шешімімен облыстық «Atyraý» газетінің аға тілшісі Амандық Абдоловтың ұсынған мақалалары «Үздік ғаламтор жарияланымы» аталымында үздік деп танылды. Ал, «Үздік телевизиялық сюжет» номинациясын «Atyraý» телеарнасының редакторы Гүлнәз Кәрімжан жеңіп алса, «Үздік баспа материалы» аталымында аудандық «Дендер» газетінің тілшісі Сүйеу Халықов топ жарды. Сондай-ақ, бір топ әріптесіміз Алғыс хаттар мен ынталандыру сыйлығына ие болды.
