Азия ойындарының жүлдегері Інжу Жұмажан туған жерге оралды
Бүгін Хиуаз Доспанова атындағы халықаралық әуежайда атыраулықтар Бахрейнде өткен ІІІ Азия жасөспірімдер ойындарының қола жүлдегері Інжу Жұмажанды және оның бапкері Асхат Ризуановты салтанатты түрде күтіп алды.
57 келіге дейінгі салмақ дәрежесінде татамиге шыққан жас дзюдошы шешуші белдесуде тайландтық Ч.Суванавичитті айқын басымдықпен жеңіп, Қазақстан құрамасының қоржынына қола медаль салды. Бұл жеңіс – оның табандылығы мен ерік-жігерінің, сондай-ақ бапкер еңбегі мен жүйелі дайындықтың нәтижесі.
Айта кетейік, бұған дейін, қыркүйек айында Інжу Жұмажан Индонезияда өткен жасөспірімдер арасындағы Азия чемпионатында дәл осы салмақ дәрежесінде қарсыластарына дес бермей, жеңіс тұғырынан көрінген болатын.
Исатай ауданында дүниеге келген Інжу спорттағы алғашқы қадамын «Барыс» балалар-жасөспірімдер денешынықтыру даярлық клубында бастаған. Бапкерлердің бағыт-бағдарын бойына сіңіріп, өз өңірінде шыңдалған жас спортшы бүгінде Олимпиадалық резервтегі облыстық мамандандырылған мектеп-интернат-колледждің тәрбиеленушісі.
Әуежайда өткен жылы жүздесуде спортшыны туыстары, ұстаздары, достары мен жанкүйерлері ыстық ықыласпен қарсы алды. Шәкіртімен бірге елге оралған бапкер Асхат Ризуанов та ел мақтанышына айналған жеңіс қуанышын көпшілікпен бөлісті.
Осы әсерлі кездесуде Олимпиадалық резервтегі облыстық мамандандырылған мектеп-интернат-колледж директорының орынбасары Сейітжан Бегисінов жас спортшыға ақжарма тілегін арнап, бұл жеңістің бүкіл Атырау облысы спортының мерейін өсірген айтулы оқиға екенін атап өтті.
Бахрейн төрінде көк байрақты желбіреткен Інжу Жұмажанның жетістігі спортта жүрген жас буынға өнеге болатын жарқын жеңіс.
Майра ЕРҒАЛИ
Суреттерді түсірген Ерлан АЛТЫБАЕВ
