Ғылым мен білімнің синергиясы — өңірлік ынтымақтастықтың жаңа кезеңі

Қазақстан Республикасының Президенті Қасым-Жомарт Тоқаев Қазақстанда «Орталық Азия – Ресей» форматында ректорлар форумын өткізуді ұсынды. Бұл бастама ғылыми-білім беру ынтымақтастығын дамытуға, гуманитарлық байланыстарды нығайтуға және өңір болашағына арналған ортақ шешімдерді іздеуге бағытталған маңызды қадам болмақ.

Бүгінде 60 қазақстандық жоғары оқу орны Ресейдің 50 жетекші университетімен белсенді әріптестік орнатқан. Мұндай өзара байланыс тәжірибе алмасуға, академиялық ұтқырлықты дамытуға, бірлескен білім беру бағдарламалары мен ғылыми зерттеулерді жүзеге асыруға мүмкіндік береді.
Қазіргі таңда Ресей университеттерінде 60 мыңнан астам қазақстандық студент білім алуда — бұл екі ел арасындағы сенім мен білім саласындағы берік байланыстардың айқын дәлелі.

Атыраудағы Губкин атындағы университет филиалы да халықаралық ынтымақтастықты нығайтуға елеулі үлес қосуда. Біздің миссиямыз — жоғары білікті инженер мамандарды даярлау, қолданбалы ғылыми зерттеулер жүргізу және өңірдің мұнай-газ саласына арналған инновациялық шешімдерді дамыту.

Энергетикалық сектордың жаһандық трансформациясы мен «жасыл» экономикаға көшу жағдайында мұндай форумдар үздік тәжірибемен алмасудың, жаңа инженерлік мектеп қалыптастырудың және ғылыми-технологиялық бастамаларды іске асырудың тиімді алаңына айналуда.

Президент ұсынған «Орталық Азия – Ресей цифрлық кітапханасы» жобасы ерекше маңызға ие.
Бұл жоба өңір университеттерінің білім беру курстарына, дәрістеріне, зерттеу базалары мен инновациялық материалдарына ашық қолжетімділікті қамтамасыз етеді. Нәтижесінде білім мен ғылымды біріктіретін бірыңғай кеңістік құрылып, интеграция мен білім алмасуға жол ашылады.

Атыраудағы Губкин атындағы Ресей мемлекеттік мұнай және газ университетінің (ҰЗУ) филиалы Қазақстан Республикасының Президенті бастамасын толық қолдай отырып, өңірлік интеграцияны, инновацияны және мұнай-газ саласындағы ғылыми-білім беру әлеуетін дамыту ісіне өз үлесін қосуды мақсат етеді. Біз Орталық Азия мен Ресей университеттерінің интеллектуалдық әлеуетін біріктіру – тұрақты энергетика құрудың, технологиялық прогресс пен уақыт талабына сай инженерлер даярлаудың жаңа мүмкіндіктерін ашатынына сенімдіміз.

Еділ САДЫҚОВ,
И.М.Губкин атындағы Ресей мемлекеттік мұнай және газ университеті филиалының атқарушы директоры