Мұражай басшысының ғылыми істер жөніндегі орынбасары Күміс Аймұқанова «Мұражайлық коллекцияларды баспаға дайындау жолдары» атты баяндамасында мұражайға тапсырылатын коллекциялық бұйымдардың дайындалу жолдарынан қызықты ақпарат берді. Ал, археология ғылыми-зерттеу бөлімінің меңгерушісі Айбек Тұрарұлы «Қола айналар материалдық мәдениет және салт-дәстүр субъектісі ретінде көрме экспозициясында» деген еңбегінде қола айналардың қай дәуір, қандай мәдениетке жататындығы жөнінде айтты.
Этнография және өлке табиғатын ғылыми-зерттеу бөлімінің меңгерушісі Самал Молдашева «Мұражайда салт-дәстүрдің насихатталуы» туралы зерттеуінде экспозицияға қойылған тұрмыс-салт бұйымдары, олардың тарихы жөнінде көпшілікті хабардар етті. «Ауған соғысы ардагерлері туралы мұражай қорын толықтыру және мәдени шараларды ұйымдастыру тәсілдері» тақырыбына жасаған ғылыми жұмысында жалпы және қазіргі кезең тарихын ғылыми-зерттеу бөлімінің маманы Жанат Жетпісбаева мұражайдың жаңа жоспары, ауған соғысына қатысқан ардагерлерден жәдігерлер жинау туралы мәлімет берді.
Гүлзада НИЕТҚАЛИЕВА.