Отанға қызмет ету — ердің ісі

Атырау гарнизонындағы 41433 әскери бөлімінде ел қорғаны болған жүзден астам сарбаз азаматтық борышын абыроймен аяқтап, салтанатты түрде запасқа шығарылды.

Бұл күн әр жауынгердің жүрегінде мәңгі сақталатын ерекше сәт. Себебі Отан алдындағы борышын өтеу ер-азамат үшін ең биік парыз, ұлтқа қызмет етудің шынайы үлгісі.

– Әскери қызмет маған қайтпас қайсарлық пен төзімділікті үйретті. Ер жігітке мінез керек екенін ұқтым. Тәуелсіздіктің тірегі болу мен үшін де, қарулас бауырларым үшін де өлшеусіз абырой, — дейді борышын адал өтеген сарбаз Дарын Кейкі.

Салтанатты сап түзеу сәтінде командирлер сарбаздарға ізгі тілектерін білдіріп, елге аман-есен оралу қайсарлық пен тәртіптің, жауапкершілік пен антына адалдықтың айғағы екенін атап өтті.
Туған ел алдындағы парызын адал өтеген сарбаздар кейінгі буынға өнеге.

Майра ЕРҒАЛИ