Қауіпсіздік – әр адамның жауапкершілігі

Мемлекет басшысы Қасым-Жомарт Тоқаев өз Жолдауында елдегі көлік апаттарының әлі де азаймай отырғанына ерекше назар аударып, бұл мәселенің өзектілігін нақты деректермен атап өтті. Президенттің айтуынша, биылдың өзінде 22 мыңнан астам жол-көлік оқиғасы тіркелген. Бұл көрсеткіш – жай ғана статистикалық мәлімет емес, қоғамдағы жауапкершіліктің деңгейін айқын көрсететін, мыңдаған отбасының тағдырына әсер ететін үлкен қасірет.

Иә, жол апатының салдарынан талай адамның өмірі қиылып, қаншама отбасы орны толмас қайғы көруде. Президент атап өткендей, мұндай жағдайлардың көпшілігі адам факторы, яғни көлік жүргізушілерінің жауапсыздығы мен жол ережесін сақтамауынан туындайды. Демек, жолдағы қауіпсіздік – ең алдымен, әр жүргізушінің санасы мен мәдениетіне байланысты.

Сондықтан әрбір азамат өз өміріне ғана емес, айналасындағы адамдардың қауіпсіздігіне де жауапты екенін сезінуге тиіс. Жол үстінде тек жылдамдық емес, сабыр, байып және өзгенің құқығына құрмет қажет. Көлік жүргізу мәдениеті – мемлекеттің емес, бүкіл қоғамның ортақ міндеті. Президенттің “көлік жүргізу мәдениетін бүкіл қоғам болып қалыптастыру қажет” деген сөзі осы жауапкершілікті әрқайсымыздың жүрегімізге жеткізді.

Сонымен қатар Мемлекет басшысы соңғы жылдары қоғамда жиі талқыланып жүрген электросамокат мәселесіне арнайы тоқталды. Екі жыл бұрын жаяу жүргіншілер жолымен жүруге шектеу енгізілгенімен, қоғамдық орындардағы жағдай әлі де алаңдатарлық. Көптеген қала тұрғындары электросамокаттардың ретсіз қозғалысынан қауіп көруде. Президенттің бұл салаға қатысты заңнамалық түзетулерді қабылдауды жеделдету туралы тапсырмасы – азаматтардың, соның ішінде балалар мен жаяу жүргіншілердің өмірін қорғауға бағытталған нақты және қажетті шешім.

Қауіпсіздік – тек полицияның, мемлекеттік органдардың немесе бақылау қызметтерінің ғана міндеті емес. Бұл – қоғамның ортақ мәдениеті мен жауапкершілігі. Әрбір жүргізуші жолда өз әрекетінің салдарын ойлап, өзгеге зиян келтірмеуге ұмтылғанда ғана жол-көлік апаттарының саны азаяды. Бұл ретте отбасындағы тәрбиенің де, мектептегі азаматтық сабақтардың да, қоғамдық насихаттың да рөлі өте зор.

Президент айтқандай, “әрбір азаматтың, әрбір баланың өмірі қымбат. Бұл мәселеде ұсақ-түйек деген болмайды.” Бұл сөз барлығымыз үшін басты ұстаным болуы тиіс. Өйткені жолдағы қауіпсіздік – тек заңмен емес, ар-ождан мен жауапкершілікпен өлшенетін құндылық.

Қауіпсіздік мәдениетін қалыптастыру – қауіпсіз Қазақстанды құру жолындағы ең маңызды бағыттардың бірі. Осы мақсатта әрбір азамат жол ережесін қатаң сақтау, қоғамдық орындарда тәртіпке бағыну, өзгелерге үлгі болу деген қағидаттарды бірінші кезекке қою керек. Сонда ғана біз жолдағы тәртіпті күшейтіп, адам өмірін қорғауға нақты үлес қоса аламыз.

Қауіпсіздік – заң талабы ғана емес, азаматтық сананың көрсеткіші.

Талғат АҒЫСОВ,
«Respublica» партиясының мүшесі, Атырау облысы филиалының белсендісі