Телекөпір аясында Атыраудағы «Иверия» грузин этно-мәдени орталығы ғаламтордағы «Скайп» желісіне қосылу арқылы Тараз, Өскемен және Талдықорған қалаларымен тікелей байланыс орнатып, сан ұлт өкілдері бір-бірін Әз Наурызбен құттықтап, ақ тілектерін білдірді. Сондай-ақ, ән айтып, би билеп, мерекелік көңіл-күйді одан әрі жандандыра түсті.
Еліміздің әр аймағындағы ұлт өкілдерін бір-бірімен тілдестіру мақсатында ұйымдастырылған телекөпірде Наурыз мейрамының маңыздылығы, қазақ халқының салт-дәстүрі, ділі, саясаты, ұлттық құндылықтары кеңінен сөз болды.
– Мұндай шара тарихымызда ең алғаш рет ұйымдастырылып тұр. Наурыз – Қазақ елінде жыл басы саналады. Сондықтан, бұл мереке — ортақ мейрам. Бүгін Қазақстан халқы Ассамблеясы мүшелері Ұлы мейраммен бір-бірімізді құттықтауға мүмкіндік алдық. Барлық қазақстандықтарды көктемнің шуақты мерекесімен құттықтаймын, ашық аспан, мызғымас достық және халықтар арасында ауызбіршілік сақталуына тілектеспін, – дейді «Иверия» грузин этно-мәдени орталығының төрағасы Зураб Бобохидзе.
«Иверия» грузин би тобы өз өнерлерін ортаға салып, тамаша көңіл-күй сыйлады.
Айгүл ЕРТІЛЕУ.
