Жылма-жыл өткізіліп тұратын «Мектепке жол» акциясының оқушылар үшін маңызы зор. «Атырау облысы білім және ғылым қызметкерлерінің кәсіптік одағы» қоғамдық бірлестігі республикалық «Бар мейірім – балаға» атты ұранымен «Мектепке жол» қайырымдылық акциясы аясында біраз жұмысты жүзеге асырды.
Білім беру басқармасының ұсынысына сәйкес, облыстық ұйым бюджеті есебінен әлеуметтік қолдауға мұқтаж екі отбасының 6 баласына 250 000 теңгенің мектеп формалары мен оқу құралдарын сатып алып берді. Сондай-ақ, ұйымның Атырау қалалық филиалы 40 балаға 1 миллион 400 000 теңге көлемінде қаржылай көмек көрсетті.
Атап өтерлігі, қайырымдылық акциясы аудандық филиалдар мен бастауыш ұйымдарда да өз жалғасын табуда. Айталық, Жылыой ауданында 66 оқушыға – 910, 0 мың, Исатай ауданында 20 оқушыға – 300 000, Қызылқоғада 20 оқушыға – 400 000, Индерде 23 оқушыға – 260 000, Мақатта 2 оқушыға 100 000 теңге көлемінде қаржылай көмек ұсынды.
Лиза СЕЙТІМОВА
