Тұмау маусымы: Вирустардан қорғанудың қандай тәсілдері бар?

Фармацевт Амир Бхогал маусымдық жұқпалы аурулар кезінде иммунитетті күшейтіп, вирустардан қорғануға көмектесетін төрт негізгі ережемен бөлісті, — деп хабарлайды Zakon.kz.

Оның кеңестерін HuffPost басылымы жариялады.

Маманның айтуынша, ең қарапайым әрі тиімді қорғану әдісі – жеткілікті ұйқы және толыққанды тамақтану. Күз мезгілінде ағзаны дәрумендер мен минералдарға бай маусымдық жеміс-жидек пен көкөністермен қамтамасыз ету өте маңызды. Бұл иммундық жүйені қолдап, жасушалардың қалпына келуін тездетеді.

Сондай-ақ, Бхогал үйде және жұмыс орнында ылғалды тазалықты жиі жасап, беткі заттарды дезинфекциялап тұрудың маңыздылығын еске салды. Вирустар кейбір заттардың бетінде екі тәулікке дейін сақталуы мүмкін, сондықтан тазалық – жұқтыру қаупін едәуір төмендетеді.

Бұдан бөлек, маман тұмауға қарсы вакцина салдыруды ұсынды. Оның айтуынша, екпе – суық тию маусымында қорғанудың ең сенімді тәсілдерінің бірі.

Қорытындылай келе, фармацевт ауру белгілері бар адамдармен тығыз қарым-қатынастан аулақ болуға кеңес берді. Бұл қарапайым ереже жұқтыру қаупін айтарлықтай азайта алады.

Бұл ақпараттар дәрігердің кеңесін алмастырмайды. Қандай да бір шешім қабылдамас бұрын, маманмен кеңесіңіз.

Бұған дейін 6 қазаннан бастап алматылықтарға жаңа дәрі-дәрмектер тегін берілетіндігін жазған болатынбыз.