Мемлекет назарындағы басты құндылық
Денсаулық сақтау саласы – мемлекеттің әлеуметтік саясатының ең маңызды бағыттарының бірі. Халықтың өмір сапасы мен елдің экономикалық әлеуеті тікелей осы саланың даму деңгейіне байланысты. Сол себепті Мемлекет басшысы Қасым-Жомарт Тоқаев өзінің биылғы Жолдауында медицина жүйесін жаңғыртуға айрықша назар аударды. Президент атап өткендей, елімізде заманауи, қолжетімді және тиімді медициналық қызмет көрсету жүйесін қалыптастыру – стратегиялық міндет. Бұл тек аурудың алдын алу немесе емдеу ісі емес, тұтас ұлт денсаулығын сақтаудың және оны ұдайы нығайтудың кешенді тетігі.
Соңғы жылдары елімізде денсаулық сақтау инфрақұрылымы жаңа деңгейге көтерілуде. Әсіресе ауылдық елді мекендердегі медициналық нысандардың жаңғыртылуы мен жаңа фельдшерлік-акушерлік пункттердің ашылуы – үлкен әлеуметтік қолдау. Бұрын қалаға сабылып баратын ауыл тұрғындары енді өз ауылында сапалы медициналық көмек ала алады. Бұл – мемлекеттің әлеуметтік әділдік қағидатына негізделген нақты қадам. Сонымен қатар, өңірлік және республикалық клиникалардың материалдық-техникалық базасы жаңартылып, озық медициналық жабдықтар орнатылуда. Мұның бәрі дәрігерлердің жұмыс сапасын арттыруға, пациенттерге көрсетілетін қызметтің деңгейін көтеруге бағытталған.
Президенттің Жолдауында айтылған тағы бір маңызды жайт – медициналық сақтандыру жүйесінің тиімділігін арттыру. Әлеуметтік медициналық сақтандыру қорының қызметін жетілдіру, қаржының ашық әрі мақсатты жұмсалуын қамтамасыз ету – халықтың сенімін арттырудың басты шарты. Бұл ретте цифрландыру мен жасанды интеллект технологияларын енгізу – уақыт талабы. Автоматтандырылған мониторинг жүйесі қызмет көрсету сапасын бағалауға, артық шығынның алдын алуға және медицина саласындағы бюрократиялық кедергілерді азайтуға мүмкіндік береді.
Сонымен қатар, денсаулық сақтау саласының басты капиталы – адам, яғни дәрігер екенін ұмытпау керек. Дәрігер – халықтың сенімін арқалаған ерекше мамандық иесі. Сондықтан мемлекет тарапынан медицина қызметкерлерінің жалақысын көтеру, әлеуметтік қорғанысын күшейту және кәсіби деңгейін арттыруға жағдай жасау аса маңызды. Қазірдің өзінде бұл бағытта нақты жұмыстар атқарылып жатыр. Дәрігердің еңбегін бағалау – қоғамның мәдени деңгейін айқындайтын көрсеткіш.
Жалпы алғанда, еліміздегі денсаулық сақтау саласын дамыту – ұзақ мерзімді стратегиялық бағыт. Бұл – елдің болашағына, ұлттың генетикалық саулығына жасалып отырған инвестиция. Мемлекет пен қоғам бірлесе отырып, осы міндетті жүйелі жүзеге асырса, қазақстандықтардың өмір жасы ұзаруы мен өмір сапасының артуы – заңды нәтиже болмақ.
Тайман САМАТҰЛЫ,
Қызылқоға аудандық ауруханасының жалпы тәжірибелі дәрігері
Сурет ашық дереккөзден алынды.
