Дәрігерлер тұрғындарды бетперде тағуға шақырды
Атырау облысында маусымдық жедел респираторлық вирустық инфекциялар (ЖРВИ) жиілеп келеді. Осыған байланысты облыстық денсаулық сақтау басқармасының өкілдері тұрғындарды сақтық шараларын қатаң ұстануға шақырды.
Мекеменің баспасөз қызметінің хабарлауынша, вирус жұқтыру қаупі жоғары қоғамдық көліктерде, сауда орталықтарында және жабық ғимараттарда медициналық бетперде тағу ұсынылады. Мамандар мұның инфекцияның ауа арқылы таралуын тежейтін ең тиімді құралдардың бірі екенін атап өтті.
Сонымен бірге, басқарма тұрғындарға келесі алдын алу шараларын сақтауды еске салды:
– қолды жиі және дұрыс жуу;
– антисептик қолдану;
– жабық орындарда әлеуметтік қашықтықты сақтау;
– адам көп шоғырланатын жерлерге баруды шектеу.
Дәрігерлердің айтуынша, қарапайым сақтық ережелерін орындау арқылы тұрғындар өз денсаулығын ғана емес, жақындарының қауіпсіздігін де қорғай алады.
Алтыншаш ҚҰРМАШЕВА
