Оқушылар арасында өткен осынау шараны Атырау қалалық білім бөлімінің әдіскері Жұмазия Жолмұханова кіріспе сөзбен ашты. Өнер сайысына қатысушылардың бәрі екі күйден орындады. Бірі – күйші аталарының «Адай» күйі екіншісі – өз қалауы. Мұнтаздай боп киінген ұл-қыздың бәрінің қолында – қара домбыра. Осынша жас күйшінің арасында болашағынан үміт күттіретіндей балалар да аз емес боп шықты.
Айталық, жүлделі бірінші орын – Айтуар Мәдиев (мектептен тыс жұмыс орталығының оқушысы) пен Тұрлыхан Аққалиевке (Ғ.Мұратбаев атындағы мектеп оқушысы), жүлделі екінші орын – Ибраһим Сұлтанов (Қ.Смағұлов атындағы орта мектеп оқушысы), Аяжан Дәулетова (№17 мектеп-лицей оқушысы) және Елхан Теміржановқа (С.Датов атындағы орта мектеп оқушысы), жүлделі үшінші орын – Бекет Орынбаев (№30 орта мектеп оқушысы), Данияр Абатов (Ш.Уәлиханов атындағы орта мектеп оқушысы), Эльдар Ризабеков (№6 орта мектеп оқушысы) және Аян Науешевке ( Абай атындағы орта мектеп оқушысы) бұйырды.
«Көрермен көзайымы» номинациясын қалалық мектептен тыс жұмыс орталығының оқушысы Мадияр Нұрлыбаев алды. Ал, байқаудың бас жүлдесін қаладағы №33 орта мектеп оқушысы Әлихан Ниғымов иеленді.
Құрманғазы туралы Хамит ақын толғауындағы «Ұлылылық басталған ғой «Кішкентайдан…» деген жолдар осы сәт ойымызға орала берді («Кішкентай» – ұлы сазгердің алғашқы туындыларының бірі). Балғын өнерпаздардың сайысы туралы біз де «Күйшілік басталған ғой кішкентайдан..» деген пікір түйдік.
Лиза СЕЙТІМОВА.
Суреттерді түсірген
Ерлан АЛТЫБАЕВ.
