Шәкірт жүрегіне жол табу үшін Гүлжайнар Нығметқызы ізденеді. Ол алғашқы еңбек жолын өзінің туған топырағы Қызылқоға ауданының Тасшағыл ауылында бастады.
Білім берудің жаңа әдіс-тәсілін жетік меңгерген ұстаздың М.Әуезовтің «Көксерек» әңгімесі бойынша өткізген ашық сабағы «Қазақстан Республикасындағы филологиялық білім беруді дамытудың негізгі басымдықтары» атты Қазақстан Республикасы филологтарының съезінде ең үздік бейне-сабақ ретінде танылды. Осылайша ол таспаға еніп, республиканың техникалық-кәсіптік білім беру ұйымдарына таратылды.
Ұдайы ізденіс үстінде жүретін Гүлжайнар Нығметқызы ғылыммен айналысуға ден қойды. Ол «Қазақ тілі мен әдебиеті» мамандығының магистратурасын бітіріп, педагогика ғылымдарының магистрі атанды. Ғылыми-зерттеу жұмыстарының нәтижесінде шыққан мақалалары бұқаралық ақпарат құралдарында жарияланса, білім беру саласында өзекті мәселелерді көтеретін халықаралық, республикалық, облыстық деңгейде өткен ғылыми-тәжірибелік конференцияларда жасаған құнды баяндамалары жинаққа енді.
Л.Шайхашқызы.
