Қазақстан Республикасының Конституциясы күнімен тұспа тұс келген мектеп ғимаратының ашылу салтанатында облыс әкімі Бақтықожа Салахатдинұлы сөз сөйледі.
– Елбасының тікелей тапсырмасымен елімізде ең алдымен халықтың денсаулығы, содан кейін өскелең ұрпақтың білім алуына көңіл бөлінуде. Облыста көптеген балабақшалар, мектептер пайдалануға берілуде. Екеуі таяу күндері қатарға қосылады. Ал, алтауының құрылысын жыл аяғына дейін аяқтаймыз.
Мемлекет басшысының тапсырмасы негізінде оқушылар үш тілді еркін меңгеруі тиіс. Жаңа мектеп табалдырығын аттағалы отырған оқушыларға, ұстаздар мен ата-аналарға бұл мәселеге баса көңіл бөлуді тапсырамын, – деді аймақ басшысы.
Облыс әкімінің айтуынша, соңғы екі жылда ғана 60 мектепке күрделі жөндеу жүргізілген. Олар барлық қажеттілікпен қамтамасыз етілген. Ал, Құрсай елді мекеніндегі жаңа білім ғимаратын сапалы салған «БатысАльянсСтрой» мекемесіне өңір басшысы ризашалығын білдірді.
Ауыл тұрғындарының атынан сөйлеген ардагер ұстаз Мәншүк Шығанақова былай деді:
– Мен осы мектепте 45 жыл еңбек еттім. Қазір зейнет жасындамын. Жаңа білім ошағының салынуын асыға күттік. Мемлекет басшысына және оның салиқалы саясатын жергілікті жерде жүзеге асырып отырған облыс басшыларына зор алғысымды айтамын, – деді.
Биыл мектеп бітіргелі отырған 11 сынып оқушысы Дана Мұратова жаңа білім ордасында шәкірттердің жан-жақты білім алуына барлық жағдай жасалғанына разылық танытты.
Салтанат соңында облыс әкімі Бақтықожа Ізмұхамбетов жаңа білім ордасының сиволикалық кілтін мектеп директоры Шығанақ Тұрғанбайұлына тапсырды.
Мектеп кабинеттерінің барлығы дерлік заманауи құрал-жабдықтармен, жиһаздармен жабдықталған. Мультимедиялық, лингафондық, компьютерлік сыныптар, химия-биология, физика пәндері зертханалары үшін жаңа құрылғылар алынған. Мектептің көне ғимаратында акт, спорт залдары, асхана және еңбекке баулу сабағы үшін шеберханалар болмаған еді. Ал, жаңа ғимаратта оқушылардың әр пән бойынша практикалық, теориялық білім алуына бар жағдай жасалған. Акт залының сахнасында күмбірлеген күй ойналып, спорт залында оқушылар жаттығып жатты.
Осы шара барысында біз тілдескен Құрсай ауылының байырғы тұрғындары Қалықыз Жәкиева мен Жәнипа Бозбанова «Бұл мектеп қай жағынан да ешбір облыстың мектептерінен кем түспейді. Бұрын ескі ғимаратта өз балаларымыз білім алып, қазір әр салада қызмет етіп жатса, бүгін жаңа ғимаратқа немерелерімізді оқытуға алып келдік. Бұл еңбектің бәрі Елбасының сарабдал саясатының нәтижесі екенін айту керек» деді.
Балабақша аты – Ақ сұңқар»
Содан соң облыс әкімі Бақтықожа Ізмұхамбетов «Балапан» мемлекеттік бағдарламасы аясында Көкарна селосында пайдалануға берілген 280 орындық «Ақ сұңқар» балабақшасының ашылу салтанатына қатысты.
– Мемлекет басшысы 3-6 жас аралығындағы балаларды балабақшамен толық қамту керектігін міндеттеді. Жасыратыны жоқ, бұл бағытта біз әлі де біраз іс тындыруымыз керек. Соңғы екі жылда мектеп жасына дейінгі балаларды тәрбиелейтін 67 орын ашылды. Биыл 12 бүлдіршіндер отауы пайдалануға берілмек, келесі жылы 15 балабақша салынбақшы. Соның өзінде де сәбилерді толық қамти алмаймыз. Өйткені, қазір облыста 18 мың сәби балабақша кезегінде тұр. Сондықтан, бұл жұмыстар жалғаса береді, – деді аймақ басшысы. Содан соң бүлдіршіндер отауының директоры Лиза Жұмағалиеваға балабақша кілтін табыс етті.
Балабақша қазіргі заманауи талаптарға сай жабдықталған, жас жеткіншектердің жеке тұлға ретінде қалыптасуына, рухани-танымдық тұрғыдан тәрбие мен білім алуына толық жағдай жасалған. 12 топтық балабақшада балалардың жатын бөлмелерімен қатар, әртүрлі бағытта еңбек етуге бейімдейтін би үйретін бөлмесі, асхана қызмет етеді. Ғимарат ішін аралаған облыс әкімі балаларды сапалы тағаммен тамақтандырып, әсіресе, ешкі сүті өнімдерімен көбірек қамту қажеттігін баса айтты.
Балабақшаның ашылуын көптен күткен көкарналық кішкентай бүлдіршіндердің қуанышында шек болмады. Олар облыс әкіміне қазақ, орыс, ағылшын тілдерінде өлең оқып, ән салып, ризашылықтарын білдірді. Ата-аналар да мұндай әдемі, әсем балабақшаның бой көтеріп, пайдалануға бергені үшін облыс, қала басшыларына алғыстарын жеткізді.
Алтыншаш ҚҰРМАШЕВА.
Суреттерді түсірген Ерлан АЛТЫБАЕВ.
