Атыраулық оқушылар халықаралық олимпиадада жүлделі орындарға ие болды
5–9 қараша аралығында Тәжікстанның астанасы Душанбеде Омар Хайям атындағы математика және информатика пәндерінен халықаралық олимпиада (KhiMIO 2025) өтті. Зияткерлік деңгейі жоғары бұл додаға Қазақстан, Ресей, Малайзия, Тәжікстан, Өзбекстан, Қырғызстан, Әзербайжан, Беларусь және Түрікменстаннан келген командалар қатысып, білімдерін сарапқа салды.
Олимпиада қорытындысы бойынша Қазақстан атынан қатысқан сегіз оқушы жүлделі орындарға ие болды. Олардың қатарында Атырау облыстық №1 «Білім-инновация» лицей-интернатының оқушылары да бар. Аталған білім ордасының оқушысы Бердібек Орынбасар математика бағыты бойынша күміс медаль жеңіп алды. Ал 7–8 сыныптар арасында өткен информатика бағыты бойынша лицейдің тағы бір оқушысы Азамат Рахимбердиев күміс жүлдегер атанды.
Халықаралық олимпиада жүлдегерлерін Хиуаз Доспанова атындағы халықаралық әуежайда жақындары мен мұғалімдері зор қошеметпен қарсы алды. Жас таланттарға болашағына зор сенім білдіріп, ақ тілектерін жаудырды.
Жеңімпаздарды шын жүректен құттықтаймыз! Білім көкжиегін кеңейтіп, биік белестерді бағындыра берулеріне тілектеспіз!
Еркеназ ҚАЛИЖАН
Суреттерді түсірген Әнуар ӘБІЛҒАЗИЕВ
