Ардагер ұстаздарға құрмет

Ұстаз – адам өміріне түзу жол сілтейтін, ұлт болашағын тәрбиелейтін ұлы тұлға. Білімнің шырағын жағып, шәкірт жүрегіне жол таба білген білім саласы ардагерлеріне арналған марапаттау рәсімі өтті.

Салтанатты шарада облыс әкімінің орынбасары Дарын Шамұратов ардагер ұстаздарды жылы лебізбен құттықтап, олардың қажымас еңбегі мен қоғамдағы рөліне ерекше тоқталды.

– Ардақты ардагер ұстаздар! Сіздерді кәсіби мерекелеріңіз – Ұстаздар күнімен шын жүректен құттықтаймын. Ұстаз – ұлағатты есім. Адам баласын білім нәрімен сусындатып, тәлім-тәрбие беріп, асыл қасиеттерді бойына дарытуда, бағыт-бағдар беруде ұстаздың еңбегі орасан. Білім сапасын арттыруға, кәсіби шеберлікті нығайтуға, мұғалімдердің әлеуметтік мәртебесін көтеруге қосқан үлестеріңіз елеулі. Сіздерге мықты денсаулық, отбасыларыңызға амандық тілеймін!-деді Д.Шамұратов.

Марапаттау рәсімінде білім саласында көп жылдар еңбек еткен ардагер ұстаздар ерекше құрметке ие болды. Қазақстан Республикасының Оқу-ағарту министрлігінің «Еңбек ардагері» медалімен он ұстаз марапатталды. Сондай-ақ, ҚР Ғылым және жоғары білім министрлігі «Еңбек ардагері» медаліне Темірбек Әшен лайық деп танылды. ҚР Оқу-ағарту министрінің «Ұстазға алғыс» құттықтау хаты Биғайша Жолмұхановаға табысталды.

«Еңбек ардагері» медалін өңіріне таққан ардагер ұстаздардың бірі – Зәмзагүл Өтешова. Ол Индер ауданындағы М. Әуезов атындағы орта мектепте 45 жыл бастауыш сыныпқа сабақ беріп, еңбек демалысына шыққан.

– Бұл мен үшін үлкен абырой. Шәкірттерім әртүрлі салада қызмет істеп жүр. Еңбегіміздің бағаланғаны — үлкен қуаныш, — деді ол.

Мерекелік шара барысында Д.Нұрпейісова атындағы музыка колледжінің студенттері ән айтып, ұстаздарға қошемет көрсетті.

Еркеназ ҚАЛИЖАН