«НҰР ОТАННЫҢ» АУДАНДАҒЫ ЖАҢА ҒИМАРАТЫ

Қызылқоға ауданының орталығы Миялы селосында «Нұр Отан» партиясы Қызылқоға аудандық филиалы ғимаратының салтанатты түрде ашылуы өтті.
Аудандық партия филиалының төрағасы, аудан әкімі Мақсот Мұқанов «Нұр Отан» партиясы Қызылқоға аудандық филиалы жаңа ғимаратқа көшіп, аудан тұрғындары қуанышқа бөленіп отырғанын айтты.

– Партия құрамында екі мың алты жүз мүшесі бар. 13 бастауыш партия ұйымдарына біріктірілген. Партиялық бақылау комиссиясы, жемқорлықпен күрес жөніндегі қоғамдық кеңес жұмыс істейді. Биылғы жылы «Нұр Отан» партиясының қабылдау бөлмесіне 143 ауызша, жазбаша өтініш түсіп, олардың 42-сі өз шешімін тапты. Аудандық партия филиалының төрағасы ретінде биыл 84 тұрғынды қабылдадым. Арыздардың барлығы да қанағаттандырылды. Тағы бір айта кететін жайт – жыл сайын өз шешімін таппай жүрген өкпе дертіне ұшыраған науқастарды тұрғын үймен қамтамасыз ету мәселесінің күрмеуі шешіліп, партияның араласуымен биыл он бір отбасы баспаналы болды, – деді ол.
Бұдан кейін қоғамдық жұмыстарға белсене араласып, аудан экономикасының өрлеуіне мол үлес қосып жүрген партия мүшелеріне Алғыс хат тапсырылды. Ғимарат есігіне керілген лента қиылып, Құрманғазының «Сарыарқа» күйі шалқыды.

Мағрупа БАҚЫТЖАНҚЫЗЫ,
Қызылқоға ауданы

Баға берсеңіз
Атырау газеті
Пікір қалдырыңыз