Мақаттағы балалар балабақшаға неге бес айдан соң оралды? (ФОТО)

IMG 4087 Жаңалықтар

Елбасы Нұрсұлтан Назарбаевтың тапсырмасына сай ауылдық жердегі әлеуметтік нысандар күрделі жөндеуден өтіп, тұрғындардың жақсы тұрмыс кешуіне жағдай жасалуда. Осы істің дәлелі іспетті Мақат кентінде «Балбөбек» балабақшасы күрделі жөндеуден кейін есігін айқара ашты. Білім беру бөлімінің үйлестіруімен жөндеу жұмыстары кезінде балдырғандарға аудандағы өзге балабақшаларға қатынауына мүмкіндік жасалды.

IMG_4087

Балабақшаның ашылу салтанатына қатысқан кент әкімі Болатбек Сәрсен тұрғындарды пайдалануға берілген әлеуметтік нысанның ашылуымен құттықтап, жылы лебізін білдірді.

Ол Елбасының тапсырмасымен ауданда тағы бір балабақша күрделі жөндеуден өткенін, «Мәңгілік Ел» боламыз деп алдына үлкен мұрат қойып отырған мемлекетімізде жас ұрпақтың тәрбиесіне үлкен маңыз беріліп отырғанын жеткізді. Қазақтың ұлы жазушысы Мұхтар Әуезовтің «Ел боламын десең, бесігіңді түзе» деген аталы сөзін тілге тиек ете келіп, Елбасы Нұрсұлтан Назарбаевтың 2020 жылға дейін еліміздегі 3-6 жастағы балдырғандарды толықтай балабақшамен қамтуды міндеттегенін атап өтті. Ата-аналар атынан сөз алған ардагер Қамажай Әмірова балабақшаның ашылуына ұйытқы болғаны үшін Елбасына және жергілікті билікке ризашылығын білдірді, еліміздің гүлдене беруіне ізгі тілегін арнады.

IMG_4066

Екi қабатты «Балбөбек» балабақшасы 170 орындық. 1989 жылы пайдалануға берiлгелі бергі уақытта жай жөндеулер жүргізіліп-ақ келеді. Дей тұрғанмен, қазіргі заманға сай жабдықталуы алғашқы рет.

Биылғы жылы 86 млн. 729 мың теңгеге күрделi жөндеу жүргiзiлдi. Осы жылдың сәуір айында басталған құрылыс жұмыстарын «Эра» ЖШС-і бес ай iшiнде аяқтады.

IMG_4073

Мұнда балалардың ойын және жатын бөлмелері, музыка залы, медициналық бөлме, асхана сапалы жиһаздармен жарақтандырылған.

Аула іші мұнтаздай таза. Қоршау шарбақтары тұрғызылып, ойын алаңдармен жарақтандырылған.

IMG_4091

Кент әкімі Б.Сәрсен балабақшаны аралап, балдырғандардың жатын бөлмесі мен оларға жасалған барлық жағдаймен жіті танысты. Өз кезегінде бүлдіршіндер мәртебелі меймандарға арнап, шағын концерттік бағдарлама дайындап, көпшілікті өнерімен тәнті етті. Былдырлаған бала тілімен бүлдіршіндер бүгінгі бейбіт күннің құндылығын айтып, би билеп, ән шырқады. Балалардың жүзіндегі қуаныш ересектердің де көңілін көншітіп, әдемі әсер қалдырды.

Гүлзада САЛИКОВА.

Баға берсеңіз
Атырау газеті
Пікір қалдырыңыз