Мақаш ауылдық округінің тұрғындары үлкен қуанышқа кенелді. Конституция күніне орай Иманов ауылы мен округ орталығы Алға ауылын байланыстыратын жаяу жүргіншілер көпірі пайдалануға берілді. Көпір Көнеу өзенінің үстіне салынған, ұзындығы 144, ені 2,5 метр. Жаңа көпірдің екі жағында да 25 метрлік мүгедектерге арналған пандус бар. Үстіне жарық шамдары орнатылған. Құрылысын жүргізген мердігер мекеме “Каспиан Контракшн Трейд” ЖШС. Жаяу жүргіншілер көпірінің алды түрлі-түсті шарлармен көмкеріліпті.
Шараға жиналған тұрғындардың қайсысымен сөйлессеңіз де қуанышты екенін жасырмайды. Айтуларынша осы жерде алғаш рет 1965 жылы ағаш көпір салынған көрінеді. Кейін ол құлап қалған. Одан соң жүзбелі көпір пайдаланылыпты. Оның да тиімділігі шамалы болған соң, көпір керек екендігін айтқан тұрғындар біраз билік орындарының есігінен сығалап, талай табалдырықты тоздырған. Ақыры, 2003 жылы сол кездегі аудан әкімінің қолдауымен, тұрғындардың жинаған қаражатына темір көпір орнатылыпты. Ол бүгінде бір жағына қисайып тұр. Сол көпірмен арғы бетке өттік. Ені тар, бір адам ғана жүретін етіп жасалған екен. Үстімен қозғалғанда шынында да қорқынышты. Жоғары жағында темір жақтауы бар, бірақ оның төменгі жағы түгелдей ашық. Жауын-шашынды, мұздақты күндері аяғың тайып кетсе тіреп қалар ештеңе жоқ, бірден суға қарай тоңқалаң асасың. Кей жерлерінде еденіне төсеген тақтайларының арасы үңірейіп жатқан.
Жаңа көпірдің ашылу салтанатында аудан әкімі Бибоз Шаяхметов тұрғындарды Ата Заңымыздың мерекесімен құттықтап, облыс әкімдігінің дер мезгілінде бөлген қаражатымен биылғы жылға жоспарланған жұмыс бітіп, жаңа көпір елдің игілігіне тапсырылғалы тұрғанын жеткізді.
Қанат ҒҰМАРОВ
