Индер ауданының шаруалары күзгі терім науқанына қызу кірісіп кетті. Биыл ауданда 1288 гектар жерге егін егілген. Оның 470 гектары – картоп болса, 450 гектары – көкөніс те, қалғаны бақша дақылдары, жеміс-жидектер мен екпе шөп.
Шаруа қожалықтарының жетекшілері күздің қара суығына қалып қоймас үшін егін жинау жұмыстарын жеделдете түскен. Биыл ауданда 43 шаруа қожалығы егін егіпті. Солардың бірі – «Айсұлтан» серіктестігі. Тоғыз гектар егін алқабындағы өнімді аудандағы көпбейінді ауылшаруашылық коледжінің студенттері жинап алды. Оқу орнының аға шебері Жұмаберген Бозекенов болашақ агрономдардың көктемгі егіс пен күзгі терім жұмыстарына жыл сайын атсалысып келетінін айтады.
Сол сияқты, «Слава» шаруа қожалығы 80 гектар жерге егін ексе, соның 30 гектарына Қырғызстанның астанасынан әкелінген «манас» пиязы егіліпті. Пияздың бұл тұқымы Бішкектен арнайы алынған.
Аудан әкімінің орынбасары Қайрат Нұрлыбаев биылғы жоспардың толықтай орындалғанын жеткізді. «Жаз бойы ауданда жергілікті өнім өндірушілерді қолдау және азық-түлік бағасын тұрақтандыру мақсатында жәрмеңке өткізіліп отырады» дейді ол.
Мөлдір БАЛТАБЕКҚЫЗЫ.
Индер ауданы.
