Аtr.kz/29 сәуір, 2019 жыл. «Стартаптар шайқасы» – өз ісін енді бастаған әлеуметтік кәсіпкерлерге арналған байқауы өтті, оның жеңімпаздары әлеуметтік бизнесін бастауға «Шеврон» компаниясының грантын иеленді.
Конкурс British Council (Британдық Кеңес) ұйымы «Шеврон» компаниясымен әріптестікте іске асырып отырған «I-SEED: Әлеуметтік кәсіпкерлік және білім беру» жобасының шеңберінде өтті.
«Стартаптар шайқасы» «I-SEED Атырау» жобасы аясында екінші мәрте өтіп жатыр. 2018 жылы «Шеврон» төрт жобаға қаржы бөлді. Олардың бірі – Лунара Рыспайдың «Шын жүректен» атты қайырымдылық дүкені. «I-SEED» грантына ие болған Лунара 2018 жылы дүкенін ашып, Атырау облысы мен Атырау қаласындағы 160 отбасыға көмек көрсетті.
Биылғы «Стартаптар шайқасы» «I-SEED Атырау» жобасына қатысатын, өзінің әлеуметтік кәсіпорнын ашуды жоспарлап отырған 16 мен 25 жас аралығындағы жастар үшін ұйымдастырылды. Конкурс қарсаңында қатысушылар өз бизнес-жоспарын әзірлеу және іске асыру үшін қажетті машықтарға арналған бизнес-жоспарлау, жоба менеджменті, қаржы, маркетинг пен питчинг (инвестор табу мақсатында жобаны таныстыру) тренингтерінен өтті.
Жобаға қатысушылар сондай-ақ тәжірибелі бизнесмендермен жұмыс істеді, олар ісін енді бастаған кәсіпкерлерге тәлімгер болып, жобаларын әзірлеу мен іске қосу жағынан көмектесті. «Стартаптар шайқасы» «I-SEED Атырау» жобасына қатысушыларға оқып-үйренген барлық дағдыларды іс жүзінде қолдануға және өз жобаларын әлеуетті серіктестер мен инвесторлар алдында таныстыру тәжірибесін алуға мүмкіндік берді.
British Council директоры Джим Буттери: «Стартаптар шайқасы» сияқты бастамалар жастарды қоғамдағы әлеуметтік мәселелер туралы ойлануға және бизнес пен әлеуметтік кәсіпкерлік арқылы олардың шешімін табуға итермелейді. «Стартаптар шайқасына» дайындық барысында қатысушылар бизнес-жоспар жасау практикалық дағдыларын дамытты және бүгінгі ұсынған идеялар міндетті түрде болашақта жүзеге асырылады деп үміттенемін».
Конкурсқа дайындық кезінде «Стартаптар шайқасына» қатысушылар 10 командаға бөлініп, олардың әрқайсысы жеке жоба ұсынды. Әр топтың өз жобасын таныстыруы үшін үш минут және қазылар алқасының сұрақтарына жауап беру үшін үш минут уақыты болды. Қазылар алқасының құрамында бизнес өкілдері, Британдық Кеңес, «Даму» Қорының Атырау облысы бойынша АФ және Атырау облысы әкімдігінің өкілдері кірді.
Жобалар төрт критерий бойынша бағаланды: презентацияның сапасы; бизнес-модельдің өміршеңдігі; жаңа бизнес құру жолымен шешілетін әлеуметтік мәселенің өзектілігі; жобаның іске қосылуға дайындығы.
«Стартаптар шайқасын» ұйымдастырған «I-SEED Атырау» жобасы 2017 жылдан бері табысты мансап құру және белсенді азаматтық көзқарасты дамыту үшін қажетті білім мен машықтарды дамыту жағынан жастарға қолдау көрсету мақсатымен іске асып келеді.
«Аtr-Ақпарат»
