Атырауда еліміздің жарты ғасырлық фотошежіресін жасап шығарған фотоөнер саласы майталмандарының альбомы жарық көрді. Альбомның ресми таныстырылымы Ш. Сариев атындағы көркемсурет және қолданбалы-сәндік өнер музейінде өтті. Фотоальбомда жарияланған құнды деректер көрмеге қойылды.
Қазақ фотожурналистикасы тарихында дара қолтаңба қалдырған Рысқали Дүйсенғалиев, Нұрғожа Жұбанов және Дендербай Егізовтың еңбектері жарияланған фотоальбомның тұсаукесер рәсіміне қоғам қайраткері, жазушы Мереке Құлкенов арнайы келді. Идея авторы Мереке Құлкеновтың айтуынша, көрмеде қойылған суреттер музейдің қорында қалады. «Фотоальбомның ерекшелігі, сонау Мұхтар Әуезов, Қаныш Сәтпаев, Бауыржан Момышұлы, Әбіш Кекілбаев, Фариза Оңғарсынова сынды тау тұлғалардың ресми, бейресми сәттердегі бұрын-соңды жарияланбаған құнды деректері бар» деп атап өтті ол.
Кітап құрастырушысы Асылхан Әбдірайымұлының айтуынша, Рысқали Дүйсенғалиевтың еңбектері АҚШ, Франция, Қытай, Болгария, Румыня, Польша, Үндістан, Египет сынды әлемнің бірсыпыра елдерінің басылымдарында жарияланған. Және әр автордың қолтаңбасы өзіндік даралығымен ерекше. «Фото альбомға авторлардың әрқайсысының 70 суреті енгізілді. Көрмеге әрқайсысының 50 суреті іріктеліп, барлығы 150 сурет қойылды. Суреттер отбасылық архивтен, мемлекеттік мұрағаттан екі ай ішінде таңдалып алынды» дейді ол.
Облыстық мәдениет, архивтер және құжаттама басқарма басшысы Саламат Сабырдың айтуынша, фотоальбом аймақ басшысы Нұрлан Ноғаевтың қолдауымен жарық көрді.
Баян ЖАНҰЗАҚОВА
Суреттерді түсірген: Әнуар Әбілғазиев
