Атырау облысы ұлттық спортты дамытуда үздік боп танылды және «Алтын тұғыр» арнайы жүлдесімен марапатталды,-деп xабарлайды Атырау облыстық өңірлік коммуникациялар қызметі.
Бұл марапат өңірге «EXPO-2017» халықаралық көрмесінің аясында, атап айтқанда ұлттық спорт түрлері бойынша мамандандырылған көрмелердің қорытындысы бойынша берілген. Марапат Атырау облыстық дене шынықтыру және спорт басқармасының басшысы Азамат Бекетке табысталды.
Салтанатты шара барысында Ұлттық спорт түрлері қауымдастығының құрметті президенті Қайрат Сатыбалды, Атырау облысының әкімі Нұрлан Ноғаевты ұлттық спорт түрлерін дамытуға қосқан үлесі үшін «Елімжан» төсбелгісімен марапаттады. Сондай-ақ, «Ұйымдастырушы» және «Үздік ұйымдастырушы» аталымдары бойынша атыраулық Руслан Төлеген ұлықталды.
Айта кетейік, Елордада өткен халықаралық көрме кезінде Атырау облысының мәдениет күндері өтіп, шараға 800-ден астам спорт және мәдениет саласының өкілдері қатысқан еді.
Айқара Ғұмар
