Мұнайлы аймақтың шырайлы шаһары

 

– Сәлеметсіз бе, мен Аксай селолық округінен жер алуға 2010 жылы арыз берген болатынмын. Кезекте нешінші болып тұрғаным жөнінде қайдан барып білуіме болады? Рахмет!
Айнұр ЕРМЕКБАЕВА.

– Сіз арызыңызды Ақсай селолық округіне бергендіктен ресми жауапты сол жерден біле аласыз. Сіз қазіргі уақытта кезекте №1346 болып тіркелгенсіз.
– Сәлеметсіз бе, Серік Кенғанұлы! Баламды Атырау қаласына мектепке орналастырайын дегенмін, бірақ тіркеуде болуы керек екен. Қазіргі уақытта балам екеуміз Ақтөбе облысында тіркеуде тұрмыз. Менің осында жұмыс жасап жатқаныма бір жыл болды, өзімнің баспанам жоқ. Баламды мектепке тіркеусіз орналастыруға мүмкіндік бар ма, әлде тіркелуі міндетті ме?

Әлия.

– Қазақстан Республикасы Ішкі істер министрінің 2011 жылғы 28 қарашадағы №631 «Қазақстан Республикасының халқын құжаттандыру және тіркеудің кейбір мәселелері туралы» бұйрығына сәйкес үш ай мерзімнен асатын мерзімге уақытша тұруға, қонаққа, іссапарға, жұмысқа, оқуға, тағылымдамаға, емделуге келетін Қазақстан Республикасының азаматтары бұрынғы жерінен тіркеуден шығарылмай, жалпыға ортақ тәртіппен уақытша тұратын жері бойынша бір жыл мерзімге дейінгі аралықта тіркеле алады.
Соған сәйкес, уақытша тіркеуде тұру үшін Сіз халыққа қызмет көрсету орталығына барып, тұрғын үй құжаттары мен үй иесінің жазбаша келісімі бойынша тіркеле аласыз. Сіз осы аталғандардың негізінде балаңызды тіркелген жеріңіздегі мектепке бере аласыз.

– Құрметті Серік Кенғанұлы! Уақытша мемлекеттік акт пен жеке тұрғын үй құрылысы үшін шыққан шешімдерді беру қашан басталатындығын (қол қойылатындығын) білгім келеді.
Рустам.

– Тұрғын үй құрылысы үшін жер учаскесін бөлу жөніндегі шешімдер үй салатын аумақтарға инженерлік инфрақұрылым жүйелері (электр, су, газ, жол) толықтай жүргізілгеннен кейін берілетін болады.

– Сәлеметсіз бе! Ақжар селосындағы, Нұржанов көшесінде асфальт қашан салынады? Тағы бір айтар жай, біздің көшеде жоғары кернеулі желі тұр, ол алынбай асфальт салынбайды дейді. Ол желіні кім алады?
Гульнара ҚАЛМҰРАТОВА.

– Биыл Ақжар селосының Нұржанов көшесі жол құрылысы бойынша жобалық-сметалық құжаттарын жасақтауды қажет ететін көшелер тізіміне енгізілді. Сонымен қатар, көше бойымен жүргізілген жоғары кернеудегі электр желісінің орнын ауыстыру мәселесі де қарастырылуда. Жобалық-сметалық құжаттар жасақталып, мемлекеттік сараптамадан өткеннен кейін, сонымен қатар, қажетті қаражат мәселесі шешіліп, мердігер мекеме анықталғаннан соң ғана құрылыс жұмыстары басталады.

– Мен Мирас мөлтекауданы, Мұнайшылар көшесі,12 үйде тұрамын. Біздің ықшамауданда тек біздің көшеде ғана жол жоқ. Барлық көшеге жол төсеп, бір көшені неге жөндемей тастап кеткен?

Самал ИБРАЕВА.

– Бүгінгі күні асфальтталмаған және жартылай асфальтталған көшелердің тізімі жасалып, жобалық-сметалық құжаттары жасақталуда. Құжаттар мемлекеттік сараптамадан өтіп, тиісті қаражат бөлінгеннен кейін, сондай-ақ, мердігер мекеме анықталғаннан соң ғана құрылыс жұмыстары басталады.
– Сәлеметсіз бе! «Қолжетімді баспана-2020» («Жас отбасы-2020») бағдарламасы бойынша тұрғын үйге үміткерлер тізімі қашан жарияланады? Және комиссияның жұмысы қаншалықты ашық?

Әсел.

– 2013 жылы «Қолжетімді тұрғын үй-2020» бағдарламасы бойынша 700 жас отбасына төлем қабілеттілігін анықтау үшін «Қазақстанның тұрғын үй құрылыс жинақ банкі» акционерлік қоғамына жолдама беріліп, қазіргі уақытта олардың 183-інің төлем қабілеттілігі анықталды.
Құрылысы біткен тұрғын үйлер қалалық тұрғын үй-коммуналдық шаруашылығы, жолаушылар көлігі және автокөлік жолдары бөлімінің теңгеріміне тапсырылғаннан кейін, төлем қабілеттілігі расталған жас отбасылардың құжаттары комиссия отырысында балдық жүйе бойынша (балдың ең көп саны бойынша) қаралатын болады. Ал, төмен балл иеленген жас отбасылар жылдың аяғына дейін құрылысы бітуі жоспарланған үйлерден пәтер алуға үміткер болып есептеледі. Комиссия отырысының қорытындысымен қалалық тұрғын үй-коммуналдық шаруашылығы, жолаушылар көлігі және автокөлік жолдары бөлімінде танысуыңызға болады. Комиссия отырыстары ашық және жариялы түрде өтеді.
– Мен Уразалиева Рахима, 2004 жылы ақпан айында жер телімін алуға тіркелген болатынмын. Жолдасым әскери қызметкер, Сағыздағы әскери бөлімде жұмыс жасады. 1988 жылы қызметте жүрген кезінде көлік апатынан қаза тапты. Осы әскери қызметкердің жесірі ретінде жер телімін алуға көмек болар ма екен? Қазіргі таңда өзімнің білуімше 487-ші болып тіркеуде тұрмын. Рахмет!
– Елді мекендер аумағынан жеке тұрғын үй құрылысы үшін жер учаскелерін бөлу қолданыстағы құрылыс нормалары мен ережелеріне сәйкес дайындалған құрылыс жобалары негізінде жүргізіледі. Құрылыс жобалары дайын болғаннан кейін жеке тұрғын үй құрылысы үшін жер учаскелері Қазақстан Республикасының заңдылықтарында белгіленген тәртіп бойынша бірінші кезекте 2002-2004 жылдары кезекте тұрған азаматтарға беріледі.
Сіздің жеке тұрғын үй құрылысы үшін жер учаскесін бөлу жөніндегі арызыңыз қалалық сәулет және қала құрылысы бөлімінде №463 болып тіркелген.
Жер учаскесін алу кезегінде 2004 жылдан бері тұрғандықтан Сізге қалалық сәулет және қала құрылысы бөліміне жолығып, жер учаскесін нақты қай аумақтан алғыңыз келетіндігін хабарлауыңыз қажет.
Сондай-ақ, қазіргі уақытта жеке тұрғын үй құрылысы үшін жер учаскелерін беру инженерлік коммуникация желілері толықтай жүргізілгенге дейін уақытша тоқтатылғанын қаперіңізге беремін.

– Қайырлы күн! 2010 жылы мен қызым Мусаева Маликаны балабақшаға орналастыруға арыз берген болатынмын. Осы жылы балабақшаға жолдама алып, 20 күннен кейін №6 балабақшаға барсам, жолдаманың 10 күнге ғана жарамды екендігін жеткізді. Бірақ, бұл туралы маған ешкім ескерткен жоқ. Егер баланың орны алдын ала тіркелген болса, ол орын басқа кімге беріледі? Жолдаманың жарамдылығы 10 күн деп қай заңда жазылған? Және ол неге жолдамада көрсетілмеген? Осы мәселені шешіп беруіңізді өтінемін.
Құрметпен, Сырым.

– Балабақшаға жолдама алғаннан кейін, әрбір ата-ана тиісті балабақшаның басшысына жолдаманы апарып, баланың медициналық тексеруден өту мерзімін әкімшілікпен келісуі қажет. Жолдаманың 10 күн мерзімге дейінгі жарамдылығы заңда көрсетілмегендіктен, жолдама жылдың соңына дейін жарамды.
– Сәлеметсіз бе! Елтаңбасыз мөрді жасатуға рұқсат алу туралы толық кеңесті қайдан алуыма болады?

Оксана БАКИРОВА.

– Елтаңбасыз мөрлер мен мөртабандарды дайындау үшін рұқсат алу мәселесі бұрын Қазақстан Республикасы Үкіметінің 2011 жылғы 11 қарашадағы №1333 «Штемпель-граверлік кәсіпорындарды ашу және олардың жұмыс істеу қағидаларын бекіту туралы» қаулысымен реттеліп отырған. Жоғарыда аталған ережелерге сәйкес тиісті рұқсатты осы уақытқа дейін ішкі істер органдары беріп келді. Бірақ, аталған Ереже Қазақстан Республикасы Үкіметінің 2012 жылғы 21 қарашадағы №1474 қаулысымен күшін жойды.
Бұл қаулы Қазақстан Республикасының 2012 жылғы 10 шілдедегі №36 «Қазақстан Республикасының кейбір заңнамалық актілеріне рұқсат беру құжаттарын қысқарту және мемлекеттік органдардың бақылау мен қадағалау функцияларын оңтайландыру мәселелері бойынша өзгерістер мен толықтырулар енгізу туралы» Заңын орындау мақсатында қабылданған.
Сондықтан, қазіргі уақытта аталған кәсіпкерлік қызмет түрімен айналысу үшін мемлекеттік органдардан қандайма болмасын рұқсат алудың қажеттілігі жоқ.

– Сәлеметсіз бе! Мен «Авангард-2» мөлтекауданындағы №3 үйде тұрамын, біздің үйге терможаңғырту бағдарламасы бойынша күрделі жөндеу жұмыстары жүргізілуде. Қазір бұрынғы бетонның үстіне жаңа құрылғыларды орнату арқылы ескі күнқағар шатырларды жөндеу жұмыстары жүргізілуде. Басқа көп қабатты тұрғын үйлерде бетон күнқағарлар алынып, орнына темір күнқағар шатырлар қондырылды. Неге біздің үйдің күнқағарын ауыстырмаған? Біздің үйге 40 жыл болғандықтан да бетон күнқағарлар опырылып түсуі мүмкін. Сонымен қатар, құрылысшылар оған одан сайын салмақ салуда. Осы мәселені шешуге көмектесуіңізді өтінемін.
Құрметпен,
Наталья
ШАРАФУТДИНОВА

– 2012 жылы «Авангард-2» ықшамауданындағы №3 үйге тұрғын үй-коммуналдық шаруашылығын жаңғырту бағдарламасы шеңберінде күрделі жөндеу жұмыстары жүргізілді.
Аталған үй тұрғындарының ұсынысы бойынша тұрғын үйдің күнқағар шатырларының техникалық жағдайы қайта тексеріліп, нәтижесінде осыған дейін сметалық құжаттарда қарастырылмаған тұрғын үйдің күнқағар шатырларына қосымша жөндеу жұмыстары жүргізілді (пәтер иелерінің 2013 жылғы 4 қаңтардағы жиналыс хаттамасы). Сметаға сәйкес бетон плиталар жөнделіп, қосымша тіректермен күшейтілді. Ағаш құрылғылардан жасалған қаңқалар (каркастар) орнатылып, ақ және көк түсті профилдік қаңылтырлармен қапталды.

– Сәлеметсіз бе? Менің аты-жөнім Хасанова Жанат, «Самал» шағын ауданындағы 6 көше 20 үйде тұрамын. Былтыр біздің шағын ауданда тек екі көшеге – 2-ші және 17-ші көшелерге жол төселді. Біздің шағын аудан көшелеріне тағы да қосымша жол төсеу жоспарда бар ма, өйткені, аудан толыққа жақын қоныстанған, үйлер орталық жолдан алыс орналасқан. Және тұрғындарды толғандыратын екінші мәселе: «Самал» шағын ауданының ішімен қатынайтын қалалық маршрутты іске қосу жоспарда бар ма?
Құрметпен, Жанат.

– Жол құрылысы жобалық-сметалық құжаттары жасақталған нысандарға ғана жүргізіледі. Бүгінгі күні «Самал» ықшамауданындағы жолдар жобалық-сметалық құжаттарын жасақтауды қажет ететін нысандар тізіміне енгізілді. Жобалық-сметалық құжаттар жасақталып, мемлекеттік сараптамадан өткеннен кейін, сонымен қатар, қажетті қаражат мәселесі шешіліп, мердігер мекеме анықталғаннан соң ғана құрылыс жұмыстары басталады.
«Самал» ықшамауданы арқылы қатынайтын қалалық маршрут ашу мәселесі тұрғын үй-коммуналдық шаруашылығы, жолаушылар көлігі және автокөлік жолдары бөлімі мамандарымен зерттеліп, құжаттары тендерлік комиссия отырысында қаралатын болады.

– Қайырлы күн! Мен Атырау қаласы Ақжар селосы Нұржанов көшесінің тұрғынымын. Аты-жөнім – Калмуратова Мадина. Бірнеше күн бұрын менің үйімнің алдына қоқыс төгетін үлкен контейнер әкеліп қойып, оған бүкіл Ақжар селосының тұрғындары қоқыстарын төгуде. Осы контейнерден шығатын жағымсыз иістен мен және менің жанұям зардап шегіп отырмыз. Терезе ашып, таза ауа жұтудан қалдық. Бұл мәселемен кімге шағымданарымызды да білмейміз. Сізден осы контейнерді адамдар көп шоғырланбаған басқа жерге ауыстыруға ықпал етуіңізді сұраймын.
Құрметпен, Мәдина.

– Санитарлық норма талаптарына сәйкес, қоқыс контейнерлері тұрғын үйлерден 25 метрден 100 метрге дейінгі арақашықтықта орнатылуы тиіс. Аталған контейнер Сіздің үйіңізден 30 метр қашықтықта орнатылғандықтан санитарлық талаптарға қайшы келмейді. Алайда, Сіздің өтінішіңізді ескере отырып, менің тарапымнан қалалық тұрғын үй-коммуналдық шаруашылығы, жолаушылар көлігі және автокөлік жолдары бөліміне аталған қоқыс контейнерінің орнын ауыстыру мәселесін қарау жөнінде арнайы тапсырма берілді.
– Біздің қаламыздағы «Қиял әлемі» ойын ойнап, көңіл көтеруге жақсы еді, оны ашуға немесе орнына басқасын салуға болмай ма, мүмкіншілік жетеді ғой.

Гүлден САБИРОВА.

– «Қиял әлемі» ойын-сауық кешенінің меншік иесі жеке компания болып табылады. Қазіргі уақытта компания жұмыс бағытын өзгертіп, бизнестің басқа түрімен айналысуда.
Бүгінгі күні қалада «РетроПарк», «Жастар демалыс саябағының» құрылысын жүргізу жөнінде шешім қабылданды. Аталған саябақтарда балалардың ойын аттракциондары орнатылатын болады.
Сонымен қатар, қала кәсіпкерлері бірнеше сауда, ойын-сауық орталықтарын салуды жоспарлап отыр.

– Серік КЕНҒАНҰЛЫ! Атырау селолық округі, Құрманғазы селосы тұрғындары атынан Бейбітшілік көшесіне қашан жол салынатынын білгім келеді, селоның орталық көшелерінің бірі асфальтталмай қалып отыр. Жергілікті билік үш жыл бойы уәде берді, бірақ нәтижесіз. Сондай-ақ, селомызда қоқыс контейнерлері қашан орнатылады екен, қоқыс жинайтын машина аптасына бір рет келетіндіктен тұрғындар күнделікті қоқыстарды өз күштерімен қалаға тасуда. Бұл селода антисанитариялық жағдайды туғызып отыр.
Малика.

– Бүгінгі таңда Ө.Рысқалиев (бұрынғы Бейбітшілік) көшесі жол құрылысы бойынша жобалық-сметалық құжаттарды жасақтайтын нысандар тізіміне енгізілді. Жобалық-сметалық құжаттар жасақталып, мемлекеттік сараптамадан өткеннен кейін, сонымен қатар, қажетті қаражат мәселесі шешіліп, мердігер мекеме анықталғаннан соң ғана құрылыс жұмыстары басталады.
Округтегі қатты тұрмыстық қалдықтарды тасымалдау жұмыстарымен «Батур» ЖШС айналысады. Сіздің ескертулеріңіз қаперге алынып, селолық округ әкіміне елді мекеннің санитарлық жағдайын қалыпқа келтіру мәселесін шешу тапсырылды. Сонымен қатар, қосымша қоқыс контейнерлерін қондыру шаралары алынатын болады.

– Сәлеметсізбе, құрметті әкім. Менім аты-жөнім Төлепов Нұрбол. Мен 2001 жылдан бастап облыстық ауруханада рентген-лаборант болып үздіксіз еңбек етіп келемін. Үйленгенмін, мектеп жасындағы екі балам бар. Қазіргі уақытта Атырау облысы Махамбет ауданы Алға селосы Каспий көшесіндегі 1 үйде тұрамын. Село қаладан 40 шақырымдай жерде орналасқан. Қалада тұратын туысқандарым жоқ болған соң, жұмысқа ауылдан барып келуге тура келеді. Біз әке-шешеммен, іні-келініммен және інімнің екі баласымен бірге бір үйде тұрамыз. 2009 жылдың қыркүйек айында қалалық әкімдік Қазақстан Республикасы «Тұрғын үй қатынастары туралы» Заңның 67, 69- баптарына сәйкес мемлекеттік тұрғын үйге мұқтаж, осы елді мекенде тұрақты тұратын және әлеуметтік жағынан қорғалатын табысы аз бұрынғы топтарына жататын, сонымен қатар, тұрғын үйге мұқтаж деп танылған мемлекеттік, бюджеттік мекемелердегі ҚР аумағында жеке меншік тұрғын үйі жоқ қызметкерлерден арыз қабылданды. Сол себепті 2009 жылдың қазан айында қалалық ТКШ бөліміне тұрғын үйге өтініш жаздым. 2010 жылдың 26 қарашасында «Нұр Отан» ХДП облыстық филиалында өткен бұрынғы қала әкімі Мереке Исмұратовтың қабылдауында болып, сол қабылдауда комиссия маған үй бөлу туралы шешім кабылдады. 2010 жылдың 27 қарашасында «Прикаспийская коммуна» газетінің 4-ші бетінде «Тұрғындар мәселесін партия шешеді» деген тақырыпта мақала жарияланып, онда 2011 жылы маған үй берілетіндігі туралы айтылған. Осы жағдайларымды ескере отырып және комиссияның 2010 жылғы «Пәтер бөлу туралы» шешімі негізінде баспана алуыма көмектесуіңізді сұраймын.
Ізгі тілекпен,
Нұрбол ТӨЛЕПОВ.

– Сіз бюджеттік мекеме қызметкері ретінде 2009 жылдың 20 қарашасынан бастап тұрғын үйге мұқтаж мемлекеттік және бюджеттік мекеме қызметкерлерінің тізіміне тіркелгенсіз. Бүгінгі күні кезектегі реттік саныңыз – №1186.
Қазақстан Республикасының «Тұрғын үй қатынастары туралы» Заңының 74-бабына сәйкес аталған тiзiмдерге енгiзiлген азаматтардың құқықтары тең деп танылады. Сол себепті аталмыш тiзiмдерге енгiзiлген азаматтардың ешқайсысына да басымдық құқығы берілмейді. Сондықтан, Сіздің өтінішіңіз заң талаптарына сәйкес кезек бойынша қанағаттандырылады.

– Қайырлы күн, құрметті Серік Кенған- ұлы! Сізге Атырау қаласы «Самал» шағынауданы, 6 көше, 20 үй тұрғыны Хасанова Жанат хабарласып отыр. Осы учаскені 2008 жылы енем – тоғыз балалы «Батыр ана» ретінде кезек бойынша алып, кейіннен жолдасым екеумізге сыйға берді. 2009 жылдан бастап біздің жаңа шағын ауданда коммуникация желілерін жүргізу жұмыстары (жарық, су, газ) басталып, 19 көшеге келіп тоқтап қалғанда таңғалысымызда шек болмады. Себебі, біздің №6 учаске 19 және 20 көшенің ортасында орналасқан. Бізге оны әкімдік жоспарға енбешген екі көшенің қосылып кеткенімен түсіндірді. Бірақ, біреудің кесірінен біздің көшенің жоспарға қосылмағанына біз кінәлі емеспіз гой. Коммуникация желілері жүргізіліп жатқанда, біз үй салуды бастап, құрылыс біткенде барлық жағдаймен қамтыламыз деп ойлаған едік. Жеке тұрғын үй құрылысын салу үшін бөлінген жер учаскелері барлық коммуникациялар жүйелерімен берілуі тиіс емес пе? Шенеуніктердің ойы бойынша, сонда біз ХХІ ғасырда жарықсыз, сусыз және газсыз өмір сүруіміз керек пе? Бүгінгі күні біз және «шетте қалған» тағы да бірнеше кісі бірігіп ақша жинап, өз тарапымыздан банктен несие алып су, жарық, газ жүргізіп алдық. Осыған байланысты мынандай сұрақ туындайды: коммуникация жүйелерін жүргізуге кеткен шығын бізге қайтарылады ма? Себебі, біз бірталай қаржы жұмсап, әкімдік жұмысын жасадық қой. Сондай-ақ, үнемдеу мақсатында көптеген материалдар құрылыс базарынан сатып алынғандықтан, растайтын құжаттарым жоқ екенін де қоса айтқым келеді. Біздің шығындарымызды есептеп шығару үшін кеткен материалдар сметасын жасақтап, шығындардың жалпы құнын ең болмаса төмен бағамен есептеп шығарса, бізге де реніш болмас еді.
Құрметпен,
Жанат ХАСАНОВА.

– Қазіргі уақытта Қазақстан Республикасының қолданыстағы заңдылықтарына сәйкес азаматтардың инфрақұрылым желілерін жүргізуге жұмсаған шығындарын төлеу үшін қаржы бөлу мәселесі қарастырылмаған. Сондықтан, Сіздің өтінішіңізді қанағаттандыруға мүмкіндік жоқ.
Сонымен қатар, Қазақстан Республикасы Үкіметінің қаулысымен бекітілген «Қолжетімді баспана-2020» бағдарламасына сәйкес, алдағы уақытта жер учаскелері тек инженерлік коммуникациялар жүргізілген аумақтардан берілетіндігін қосымша хабарлаймын.
– Қайырлы күн! Біз Досмұхамедов көшесі 93 үй тұрғындары, өзіміз дара кондоминиум құрғымыз келеді, сол бойынша бізге қандай кеңес бересіз?

Әділбек НЕТАЛИЕВ.

– Қазақстан Республикасының «Тұрғын үй қатынастары туралы» Заңының 35-бабына сәйкес үй-жайлардың иелері ортақ мүлік пен үйді күтіп ұстауға жұмсалатын барлық шығындарға қатысуға міндетті және ортақ мүліктің және дара меншіктегі үй-жайлардың сақталуы мен қауіпсіз пайдалануына жауапты деп саналады.
ПИК болмаған жағдайда, сізге пәтер иелерінің жалпы жиналысында тұрғын үйді басқару мен күтіп-ұстау мәселесін қарап, соған байланысты шешім қабылдау қажет. Сонымен қатар, пәтер иелерінің жалпы жиналысында ҚР «Тұрғын үй қатынастары туралы» Заңына сәйкес басқару нысанының төмендегідей түрлерінің бірі таңдалады. Олар:
1.Егер барлық меншік иелерінің саны 20 адамнан аспаса, олардың тікелей бірлесіп басқаруы;
2. Пәтер иелері кооперативі;
3. Кондоминиум объектісін үшінші тұлғалардың: сайланбалы немесе жалдамалы жеке тұлғалардың – тұрғын үйлерді басқарушылардың немесе заңды тұлғалардың басқаруы;
4. ҚР заңдарына қайшы келмейтін өзге де нысандар.
Осы мәселе бойынша қосымша ақпарат алу үшін Қалалық тұрғын үй инспекциясына хабарласуыңыз сұралады. Мекен-жайы: Азаттық даңғылы101а, байланыс телефоны: 254229.

– Құрметті Серік Кен- ғанұлы! Ширина ауылындағы М.Отаралиев атындағы мектептің құрылысы қашан басталады? Немерелерімізді Балықшы поселкесіндегі мектептерге тасымалдау қиынға соғып тұр.
Мұңал ҚАРАТАЕВА.

– Бүгінгі таңда «НКПОК» компаниясының әлеуметтік инфрақұрылымдық жобалар бағдарламасы бойынша Атырау қаласы Ақжайық селосындағы 120 орындық М.Отаралиев атындағы орта мектептің құрылысын салу үшін жобалық-сметалық құжаттар жасақталуда. Келісім-шартқа сәйкес барлық жобалау құжаттарын аяқтау мерзімі 2014 жылға жоспарланған.

– Сәлеметсіз бе! Мен 2005 жылдан бері мемлекеттік және бюджеттік мекеме қызметкерлер тізімінде үй кезегінде тұрамын. Бүгінгі кезегім – №233. Биылғы жылы пәтер ала алам ба?
Исатай МӘМБЕТОВ.

Атырау қаласы.
– Сіз 2005 жылдың 17 ақпанынан бастап тұрғын үйге мұқтаж мемлекеттік және бюджеттік мекемелер қызметкерлерінің тізіміне тіркелгенсіз. Бүгінгі күні кезектегі реттік саныңыз – №225.
Қазақстан Республикасының «Тұрғын үй қатынастары туралы» Заңының 74-бабына сәйкес тұрғын үйге мұқтаж азаматтардың тiзiміне енгізілгендердің құқықтары тең деп танылады. Сол себепті аталмыш тiзiмдерге енгiзiлген азаматтардың ешқайсысына да басымдық құқық берілмейді. Сондықтан, Сіздің өтінішіңіз заң талаптарына сәйкес кезек бойынша қанағаттандырылады. Сіздің кезегіңізге қарайтын болсақ, пәтер мәселесі алдағы жылы шешілуі мүмкіндігін хабарлаймын.

– Қайырлы күн, мен осы жылы наурыз айының соңында Сіздің қабылдауыңызда болдым. Маған айтқандай, квота мен үй мәселесі шешілмеді. Мен өз жатақхана бөлмемді сатып, қазір баламмен далада қалдым. Ал, Ж.Қарағаев мырза жай ғана өзін мазаламауды өтінді. Не істеймін? Мен сирек кездесетін ауру мүгедегімін, менің жағдайым өте ауыр. Енді қайда барамын?
– Сіздің сирек кездесетін науқас түрімен ауруыңызға байланысты квота бөлу мәселесін ҚР Денсаулық сақтау министрлігі шешеді. Қалыптасқан тәртіпке сәйкес, біздің тарапымыздан облыстық денсаулық сақтау басқармасына ұсыным берілді. Осы ұсынымның негізінде облыстық денсаулық сақтау басқармасы министрлікке өз ұсынымын беруі тиіс. ҚР Денсаулық сақтау министрлігі ұсынымды мақұлдағаннан кейін Сізге квота бөлінетін болады.
Тұрғын үй мәселесі бойынша Сізге қалалық тұрғын үй-коммуналдық шаруашылығы, жолаушылар көлігі және автокөлік жолдары бөліміне хабарласу қажет.

Оставить комментарий

Ваш email нигде не будет показанОбязательные для заполнения поля помечены *

*