Қазақстандықтар ұялы телефонының IMEI-кодын тіркеуге міндеттеледі

Бұдан былай әр азамат ұялы телефонының IMEI-кодын ресми тіркеуге міндетті. Еліміздің Ақпарат және коммуникациялар министрлігі осындай бастаманы қолға алды.

135882_564d98af95080b3e1a5fd68a8fcf

Өйткені “терроризмге қарсы күресте және әртүрлі қылмыстың жолын кесуде бұл аса қажет” деп түсіндірді жауапты мамандар. Ал талапқа бағынбағандардың байланыс құралдары 2019 жылдың 1 қаңтарынан бастап бұғатталады. IMEI-код бұл ұялы телефонның ішінде немесе қорабының бетінде жазылып тұрған сандар жиынтығы. Яғни ол байланыс құралының зауыттан шыққанда бекітіп берген жеке нөмірі. Бұған дейін еліміздегі азаматтар ұялы байланысты қолдану үшін SIM картасы мен куәліктегі ЖСН, яғни жеке сәйкестендіру номерін тіркеп келген еді. Енді олардың қатарына IMEI-кодты да қосу міндетті болып отыр.

«Аталған талаптардың қойылу себебі – ол ұрлыққа қатысты және құқық қорғау органдары жедел іздестіру шараларын жүргізу барысында қажет болып табылады. Бұл заң талабын толық көлемде орындау үшін және жұмыс істеу үшін былтыр 28 желтоқсанда байланыс туралы заңның 36-бабына қайта өзгерістер енгізілді. Яғни қазір ұялы телефонды тіркеу үшін ЖСН және ұялы телефонның IMEI-коды қажет»,-деді ҚР Ақпарат және коммуникациялар министрлігінің басқарма басшысы Бауыржан Қажыбаев.

Енді көпшілікті оның жүзеге асу механизмі алаңдатары анық. Бұл тұрғыда жауапты мамандар IMEI-кодты байланыс операторлары арқылы тіркеуге болатындығын айтады. Яғни жаңа телефон алсаңыз оны кеңсесіне барып тіркету керек. Ал облыс немесе аудан орталығынан шалғай орналасқан ауыл тұрғындары үшін басқа балама жолдар қарастырылып жатыр.

«Қазір біздің министрлік IMEI-кодтарды тіркеудің ережесі мен тәртібін жасап жатыр. Бұл жұмысқа ұялы байланыс операторлары және қоғамдық кеңес те белсенді атсалысуда. Ең бастысы бұл процестің барынша жеңіл өтуін қамтамасыз етуіміз керек. Осы мақсатта тіпті абоненттің ешқайда бармастан IMEI-кодты тіркейтін жолдарын қарастырып көреміз»,-деді ҚР Ақпарат және коммуникациялар министрлігі комитет төрағасының орынбасары Виталий Ярошенко.

«Ұялы байланыс операторлары кодтарының бірыңғай базасын құрудағы мақсат әртүрлі қауіп-қатер мен қылмыстың алдын алудан бөлек, контрафактілі тауар айналымына шектеу қою»,-дейді мамандар. Өйткені нарықта жасырын цехтарда жасалған телефондар өте көп. Ал біркелкі IMEI-кодтар арқылы оның көшірме екенін анықтауға мүмкіндік бар. Сәйкесінше, мұндай телефондар бұғатталып тасталады. Дәл осындай шара өз байланыс құралын мүлде тіркемгендерге де қолданылуы мүмкін. Жалпы бұл тәжірибе Түркия мен Әзірбайжан елдерінде кеңінен қолданысқа еніп, өз нәтижесін беріп үлгірді.

Айқара Ғұмар

Оставить комментарий

Ваш email нигде не будет показанОбязательные для заполнения поля помечены *

*