Атырауда тек орталықтағы және «Тұрғындар қалашығындағы» екі жағажай заңды деп есептелінеді. Аптап ыстықта одан өзге аумақтарда суға шомылсаңыз, 5000 теңгеге жуық айыппұл төлейсіз.
– Әзірге полиция қызметкерлері ескерту хаттамаларымен шектелуде. Су айдындарында және жағалауда полиция мен құтқарушылардың бірлесе атқарған жұмысы нәтижелі, алайда «жабайы жағажайларды» пайдаланушылардың қатары азаяр емес, – дейді Атырау облыстық ІІД баспасөз қызметі.
Тәртіп сақшылары бірнеше сағаттың ішінде тыйым салынған аймақта шомылған 10 адамды анықтаған. Тіпті, спирттік ішімдік ішіп, суға түскен 20 азаматқа әкімшілік шара қолданылса, 1 азамат тәртіп сақшыларына бағынбағаны үшін әкімшілік жауапкершілікке тартылыпты.
Атырау облыстық ішкі істер департаменті биыл су айдындарында қаза болған 17 адамның 9-ы балалар екенін қаперлейді.
