Atr.kz/13 қаңтар, 2020 жыл. 11 қаңтар күні Атырау қаласының маңында орналасқан «Водниково-2» ықшам ауданында екі кішкентай бала ойнап жүріп, мұз астына түсіп кеткен.
Жеткіншектердің денесін сүңгуірлер оқиға күнінің ертесінде тапты, деп хабарлайды Атырау өңірлік коммуникациялар қызметі. Бұл туралы ӨКҚ-де өткен брифингте облыстық ТЖД басшысының міндетін атқарушы Асқат Ержанов мәлімдеді.
Балалар шаналары қалып қойған жерден 15 метр қашықтықта, Перетаска өзенінде табылды. Оқыс оқиғадан көз жұмған жеткіншектердің жасы 9-да болған.
– Кәмелетке толмағандардың көз жұмуы, жыл басынан бері қайталанған үшінші факт. Барлық оқиға – демалыс күндері, ата-аналар үйде болған кезде орын алған. Біз ата-аналардан балаларын серуенге, ойнатуға жалғыз жібермеулерін, оларды қараусыз қалдырмауларын сұраймыз. Департамент туындаған жағдайларға байланысты профилактикалық бағытта жұмыстар жүргізуде. 2019-2020 қыс маусымында мұз қатқалы бері 500-ге жуық тұрғынды қамтитын 133 рейд өткізілді, – дейді Асқат Ержанов.
Атырау облыстық ТЖД басшысының міндетін атқарушы Асқат Ержановтың айтуынша, қазіргі таңда ауа температурасы – 2 градус. Ал, Атырау қаласында мұздың қалыңдығы 5-тен 10 см-ге дейін жетеді. Жұқа, әлі қатып үлгермеген мұздың салдарынан биыл Крещение мерекесі кезіндегі шомылу дәстүрі барлық жерде бірдей өткізілмейді.
– Үш ауданда, дәлірек айтсақ Исатай, Мақат және Қызылқоғада шомылу дәстүрі өтпейді. Қалған аудандар мен облыс орталығында, арнайы шомылу қоршауы жасалатын болады. Шомылу рәсімінен өтуге арналған орындар – ағаш еденмен, тұтқалармен және баспалдақтармен жабдықталады.
Крещение мерекесі кезінде қауіпсіздікті қамтамасыз ету үшін облыстық төтенше жағдайлар департаменті, ішкі істер департаменті және батыс аймақтық аэроұтқыр жедел-құтқару тобы қызметкерлері кезекшілік ұйымдастырады. Құтқарушылар тобы шұңқырда кешке дейін кезекшілік ететін болады. Азаматтарды тексерілмеген жерлерде суға түспеуге шақырамыз, өйткені мұз сынып кетуі мүмкін, – дейді Асқат Ержанов.
