Махамбет атындағы облыстық драма театры төрінде ақын, халықаралық «Шабыт» фестивалінің лауреаты Әлия Дәулетбаеваның шығармашылық кеші өтті.
«Тәңірдің берген сыйы Тәуелсіздік» мерекесіне тарту жасаған ақынның моноспектаклі көрермен көңілінен шығып, рухты тасытып, жігерді жанитын өлең-жырлары жүректерге жол тапты.
Ақын кешіне арнайы келген Төлеген Айбергенов атындағы сыйлықтың және Президенттік стипендияның иегері, ақын Светқали Нұржан мен ақын, филология ғылымдарының кандидаты Оңайгүл Тұржан, атыраулық ақын Бақытгүл Бабаш кеш иесіне шалқар шабыт тілеп, ізгі тілектерін жолдады.
Осынау шараға қолдау білдірген облыстық әкімдік атынан сөз алған аймақ басшысының орынбасары Нұрсәуле Сайлауова да ақынға қолдау танытып, лебіз білдірді.
«Ғасырлар тоғысы», «Жалғыз музам – Махамбет…», «Апам менің…» деп ер Махамбет пен ақын Фариза рухтарымен сырласу, шерменде болған Алаш арыстарының айтар мұң-наласы, кеңестік солақай саясаттың салқыны сынды көріністер арқылы көрермен көңілінен шыққан кеш туралы толығырақ «Атырау» газетінің алдағы санынан оқи аласыздар.
Гүлжан ӘМІРОВА
Суреттерді түсірген: Ерлан АЛТЫБАЕВ
